Չորս զինծառայողի կյանք խլած վթարի գործով որևէ մեղադրյալ առ այս պահը չկա
«Ուրալի»՝ չորս զինծառայողի կյանք խլած ողբերգական վթարի գործով որևէ անձի նկատմամբ քրեական հետապնդում դեռևս չի իրականացվում։ Այս մասին «Փաստինֆո»-ի հետ զրույցում հայտնեցին ՀՀ Քննչական կոմիտեից։
Հիշեցնենք՝ դեպքը տեղի է ունեցել ապրիլի 12-ին՝ ժամը 15:25-ի սահմաններում. ՀՀ ՊՆ N զորամասի զինծառայողներին տեղափոխող «Ուրալ»-ը դեռևս չպարզված հանգամանքներում դուրս է եկել ճանապարհի երթևեկելի հատվածից և հայտնվել հարակից ձորակի տարածքում: Դեպքի հետևանքով չորս զինծառայող է զոհվել, 20 զինծառայող՝ ստացել վիրավորում, որոնցից մեկի վիճակը գնահատվում է ծայրահեղ ծանր: Մյուսներն ունեն ծանր, միջին ու թեթև աստիճանի վնասվածքներ։
Դեպքից տուժածները և նրանց հարազատները պատմում են, որ «Ուրալն» անսարք վիճակում է եղել մշտապես, դեպքի օրն էլ՝ մեքենան գործի չէր ընկնում, հրելով են աշխատեցրել, ավելին՝ «Ուրալը» գերբեռնված է եղել, սահմանված թվից ավելի զինծառայողներ են եղել։ Վարորդը՝ Հովսեփ Համբարձումյանը, որն այժմ ծանր վիճակում է գտնվում, ունի մի շարք կոտրվածքներ, այդ թվում՝ ողերի, դեպքի օրն առաջին անգամ է նստել այդ մեքենայի ղեկին։
Դեպքի առթիվ ՀՀ քննչական կոմիտեի զինվորական քննչական գլխավոր վարչության 9-րդ կայազորային քննչական բաժնում ՀՀ քրեական օրենսգրքի 538-րդ հոդվածի 4-րդ մասի (Մարտական, հատուկ կամ տրանսպորտային մեքենա վարելու կամ շահագործելու կանոն խախտելը, որն անզգուշությամբ առաջացրել է երկու կամ ավելի անձանց մահ) հատկանիշներով նախաձեռնվել է քրեական վարույթ։
Առգրավվել են ավտոմեքենայի շահագործման պահանջներին, տրանսպորտային միջոցի տեխնիկական ընդհանուր վիճակին, շահագործելիությանը վերաբերող անհրաժեշտ բոլոր փաստաթղթերը։
ՀՀ Քննչական կոմիտեից «Փաստինֆո»-ի հարցին ի պատասխան հայտնեցին, որ քրեական վարույթի շրջանակներում դեռևս քրեական հետապնդում որևէ անձի նկատմամբ չի իրականացվում, սակայն լայնածավալ քննությունը շարունակվում է, ավելի շատ անձինք են հարցաքննվել, տեղեկատվություն է պահանջվել և ստացվել։
Ինչ վերաբերում է «Ուրալի» անսարք լինելու հանգամանքին, ապա ՔԿ-ից հայտնեցին, որ անսարքության վերաբերյալ իրականության պարզումը քննության առաջնային խնդիրներից է։