Հայաստանի շահերը պետք է ՀՀ իշխանությունը պաշտպանի, հակառակ դեպքում Ադրբեջանը մեծացնելու է իր տարածքային պահանջները

Հաշվի առնելով Հայաստանի ինքնիշխան տարածքից Ադրբեջանին մաս հանելու՝ վերջին շրջանում «գերագույն գլխավոր կապիտուլյանտի» արած հայտարարությունները, նաև օգտվելով «պատճառահետևանքային կապից», ադրբեջանական կողմը պարբերաբար և մշտապես խոսում է Հայաստանի տարածքի ադրբեջանական լինելուց։ Դա վերաբերելի չէ միայն Տավուշի մարզին և նրա տարածքում գտնվող «անկլավներին»։

Ադրբեջանը վերջին տարիներին հստակ ընդգծում է, որ Հայաստանը «պատմական ադրբեջանական հող» է՝ «Արևմտյան Ադրբեջանի» տարածք, որը խլվել է իրենից 1920-ական թվականներին և բռնակցվել Հայաստանին։

Այս ամենի հետ մեկտեղ, միջազգային տարբեր հարթակներ իրենց կողմից հայտնում են հայ-ադրբեջանական հարաբերությունների կարգավորմանն օժանդակելու ցանկություն, մասնավորապես բանակցությունների կազմակերպման և առկա հարցերի քննարկման տեսակետից։ Այսպես, օրերս Հարավային Կովկասում Եվրամիության ներկայացուցիչ Տոյվո Կլաարը սոցցանցերում գրառել էր․ «Սահմանների սահմանազատման վերաբերյալ իրական բանակցություններ են անհրաժեշտ, և բոլոր տարածքային վեճերը պետք է լուծվեն խաղաղ ճանապարհով` համաձայնեցված գործընթացի շրջանակներում»։

Այս կապակցությամբ Oragir.News-ը զրուցեց ադրբեջանագետ Գառնիկ Դավթյանի հետ՝ խնդրելով մեկնաբանել եվրոպացի պաշտոնյայի արտահայտած մտքերը «տարածքային վեճերի» մասին։

«Տոյվո Կլաարը խոսում է «տարածքային վեճերը» խաղաղ ճանապարհով լուծելու մասին։ Սա արդեն իսկ խնդրահարույց է, որովհետև չկա տարածք, որ երբևէ Ադրբեջանի մաս է եղել, և հիմա Հայաստանին է պատկանում։ Բազմաթիվ քարտեզներ, անգամ 1930-ական թվականների, խոսում են այդ տարածքները հայապատկան լինելու մասին։ Կլաարի հայտարարությունը, փաստորեն, բխում է Հայաստանի ներկա իշխանությունների վարքից, որոնք «կարմիր գծեր» չունեն։ Միայն մի խնդիր կա՝ Նիկոլ Փաշինյանի իշխանության մնալը․ իր ղեկավար չլինելուց է կախված Հայաստանի լինելիությունը և, հակառակը, իր ղեկավար լինելուց է կախված Հայաստանի չլինելիությունը», ընդգծել է փորձագետը՝ նշելով, որ մասնավորապես, Արցախի հանձնումը և մնացած պրոցեսները դրա ցուցիչն են, և քանի որ Հայաստանը ղեկավարող շրջանակներն աչքի չեն ընկնում հայկական ազգային շահերի պաշտպանությամբ կամ գոնե դիմադրությամբ, բնականաբար, Ադրբեջանն ահագնացնելու է իր պահանջները։

Տիգրան Աթանեսյան

oragir.news