Արցախի նախագահների՝ Բաքվում գտնվելու լուրերը չեն հաստատվում. որտեղ են նրանք

Ավելի քան 9 ամիս հարկադիր մեկուսացած արտաքին աշխարհից, սովի մատնված, զրկված կենսական պարագաներից, առանց ջեռուցում, առանց դեղորայք, լինելով` հոգեբանական ծանր ճնշման ներքո` արցախահայերը սեպտեմբերի 19-ին ենթարկվեցին ադրբեջանական զինված հարձակման:

120,000 մարդկային կյանքեր մի քանի օրվա ընթացքում հայտնվեցին բնաջնջման սպառնալիքի տակ և ի վերջո սկսվեց Արցախի հայաթափումը: Երեկ գրել էինք, որ գրեթե 120,000 մարդ արդեն Հայաստանում է, Արցախում են մնացել մոտ 150 հոգի , որոնց մեջ են նաև Արցախի երեք նախագահները` Արկադի Ղուկասյանը, Բակո Սահակյանը, Արայիկ Հարությունյանը, մի խումբ զինվորականներ, նախագահականի և կառավարության մի շարք անդամներ: Մեր ունեցած տեղեկություններով` հայրենիքը չեն լքել նաև Բակո Սահակյանի որդիները:

Այսօր արդեն տեղեկություններ ենք ստացել, որ Արցախի սահմանները հատել են ԼՂ նախկին նախագահ Արայիկ Հարությունյանի եղբայրը՝ պետնախարար Արթուր Հարությունյանը,  ԼՂ ներքին գործերի նախարար Կարեն Սարգսյանը և ԱԱԾ պետ Արարատ Մելքումյանը: Նրանք արդեն մի քանի ժամ է՝ արդեն Հայաստանում են:

Ավելի վաղ Ադրբեջանական լրատվամիջոցները լուրեր էին շրջանառել ԼՂ նախկին նախագահներ Բակո Սահակյանի, Արկադի Ղուկասյանի, ինչպես նաև Ազգային ժողովի նախագահ Դավիթ Իշխանյանի Բաքվում գտնվելու մասին։ 

Hayeli.am -ի տեղեկություններով՝ Արցախ 4 նախագահները և Պաշտպանության նախարար Կամո Վարդանյանը դեռ Ստեփանակերտում են՝ ռուս խաղաղապահների հովանու ներքո: