Փաշինյանը պարտավոր է օր առաջ ներգրավել մասնագետների. պետք է նշանակվեն հակաճգնաժամային նախարարներ. Ավետիս Քերոբյան
Այս պատերազմը վեր է հանել բազմաթիվ թերություններ, այդ թվում պատերազմ վարելու մեթոդներում, տեխնիկայի օգտագործման մեջ եւ այլն: Այս մասին Yerevan Today-ին տված հարցազրույցում նշել է Ռազմարդյունաբերության կոմիտեի նախկին նախագահ Ավետիք Քերոբյանը, որի եղբայրը՝ Վահան Քերոբյանը օրերս նշանակվել է Էկոնոմիկայի նախարար:
«Այդ թերությունները պետք է վերլուծվեն, Նիկոլ Փաշինյանը պարտավոր է օր առաջ ներգրավել մասնագետների: Այսօր երկիրը կարիք ունի հեղափոխական մեթոդներով վերակառուցման, եւ դրա համար անհրաժետ են համարձակ մտածելակերպով մարդիկ. Եղբայրս հաստատ համարձակություն ունի: Ես չեմ ուզում երկիրն ու իշխանությունը տարանջատել»,-ասաց նա:
Ավետիս Քերոբյանը չի կարծում, թե կառավարությունը պետք է ամբողջ կազմով հրաժարական տա. «Կառավարությունը պետք է ձեւափոխվի: Ես կարող եմ ասել, որ պատերազմում պարտված գեներալները զորք ղեկավարելու իրավունք չունեն:
Ես կհակադարձեմ վարչապետ Նիկոլ Փաշինյանի հայտարարությանը, թե ստեղծված իրավիճակի միակ պատասխանատուն ինքն է: Մենակ ինքը չի:
Երկիրը կարիք ունի հակաճգնաժամային կառավարման՝ հակաճգնաժամային կառավարությունով: Պետք է նշանակվեն հակաճգնաժամային նախարարներ»,-ասաց նա՝ հավելելով, որ վարչապետը նաեւ պատասխանատվություն է կրում իր լիազորությունների շրջանում այս իրավիճակից դուրս գալու համար: