Կարող են լինել այնպիսի դեպքեր, որոնք մենք չնկատենք. Տիգրան Ավինյանը՝ գաղտնի խնջույքների մասին

«Վստահեցնում եմ, որ բոլոր այն միջոցառումները, որոնք ընթանում են հակահամաճարակային կանոնների բազմաթիվ խախտումներով, դրանց հետ կապված կատարվում են համապատասխան միջոցառումներ»,- Ազգային ժողովի արտահերթ նիստում ասաց փոխվարչապետ, պարետ Տիգրան Ավինյանը՝ պատասխանելով ԲՀԿ պատգամավոր Շաքե Իսայանի այն հարցին, որ տեղի են ունենում բազմամարդ միջոցառումներ ռեստորաններում, որոնք անտեսվում են պարետատան և ոստիկանության կողմից:

«Գաղտնիք չէ, որ նման միջոցառումներից հետո հետևանքների մասին բարձրաձայնվում և խոսվում է, ինչպես նաև շատ կոշտ են լինում հետևանքները՝ օրինակ բերելով շաբաթներ առաջ Սևանում իրականացված միջոցառումը: Բոլոր այն դեպքերում, երբ հնարավոր է կանխել, կանխվում է, որ դեպքերում որ պոստ ֆակտում պետք է տուգանել, տուգանվում է, լինում են դեպքեր, որոնք աննկատ են մնում:

Նա հավելեց, որ առաջարկվում է նմանատիպ միջոցառումները անել այնպես, որ համաճարակային իրավիճակի հետ կապված հավելյալ ռիսկեր չառաջանան. «Այո, կարող են լինել այնպիսի դեպքեր, որոնք մենք չնկատենք: Սա միայն Կառավարության, պարետատան և ոստիկանության խնդիրը չէ, սա նաև մեր ՀՀ սիրելի քաղաքացիների խնդիրն է, սա պետք է համագործակցության արդյունք լինի, այսինքն՝ հակահամաճարակային պայքարը կարող է լինել Կառավարության և հասարակության համագործակցության արդյունք: Վերջին ամիսներին, կարծում եմ՝ դա ստացվում է»,- ասաց նա: