Սփյուռքի հանձնակատարի գրասենյակի աշխատակազմը 7 ամսում 82.992.200 ՀՀ դրամ պարգևավճար է ստացել

ՀՀ վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանի անունով Yerkir.am-ը գրավոր հարցում է ուղարկել և խնդրել, որպեսզի տեղեկություններ տրամադրեն, թե որքա՞ն է կազմել գլխավոր հանձնակատարի գրասենյակի աշխատակիցներին վճարված պարգևավճարների չափը՝ 01.07.2019թ. մինչև 31.01.2020թ. (7 ամսվա ժամանակահատվածում):

Ի պատասխան գրավոր հարցման՝ ՀՀ վարչապետի աշխատակազմից հայտնել են, որ Սփյուռքի գործերի գլխավոր հանձնակատարի գրասենյակում 2019թ. հուլիսի 1-ից մինչև 2020 թ. հունվարի 31-ը ներառյալ պարգևավճարների ընդհանուր չափը կազմել է 82.992.200 ՀՀ դրամ (շուրջ 174 հազար դոլար):

Կայքի տվյալներով Սփյուռքի գլխավոր հանձնակատարի գրասենյակն այս պահին ունի 48 աշխատակից: Տվյալները համադրելիս՝ ստացվում է, որ գրասենյակի աշխատակիցներին հատկացվել է միջինը 25.000 ԱՄՆ դոլարին համարժեք դրամ ամսական պարգևավճար, որն էլ համամասնորեն աշխատակիցների միջև բաժանելու դեպքում՝ ստացվում է յուրաքանչյուրին ամիսը 520 դոլար պարգևավճար:

Yerkir.am-ը հարցադրում է անում, թե ո՞ր կատարած աշխատանքի արդյունքում են պարգևատրվել նորաստեղծ կառույցի աշխատակիցները. «Ամենայն հավանականությամբ` կառավարությունը բարձր է գնահատել այդ գրասենյակի աշխատանքը, որի արդյունքում «կտրուկ ավելացել են» ներդրումները և «մեծ թափ առել» ներգաղթը»։
Կայքը նաև հայտնում է, որ այս ոլորտում իրականացված ուսումնասիրությունից պարզել է, որ այս թիվն ամենաբարձրներից է շուրջ 70 պետական կազմակերպությունների շարքում:

Նյութն ամբողջությամբ՝ սկզբնաղբյուր կայքում: