«Դիկտատորը վախեցած է և ապրում է սարսափների մեջ». ավագանու նախկին անդամը՝ իրեն բերման ենթարկելու մասին

Այսօր կեսօրին ոստիկանության աշխատակիցները Երևանի քաղաքապետարանի մոտից բերման էին ենթարկել Երևանի ավագանու նախկին անդամ Սոնա Աղեկյանին և նրա գործընկերոջը։ Նրանք Էրեբունի վարչական շրջանից իրենց հետ աղբ էին բերել և փորձել էին դնել քաղաքապետարանի շենքի մոտ: Ոստիկանները նրանց հորդորել էին աղբը նետել աղբամանը, սակայն վերջիններս չէին արել, ուստի որոշել էին նրանց տանել ոստիկանության բաժին։

168.am-ի հետ զրույցում Սոնա Աղեկյանը տեղեկացրեց, որ ոստիկանական բաժանմունքում մնացել են մեկ ժամից էլ քիչ, այնուհետև իրենց ազատ են արձակել, նշելով, որ հանցակազմ չկա։

«Իհարկե, ոստիկանների գործողությունները որակում եմ ապօրինի, նրանք երևի առավոտից քաղաքապետարանի մոտ սպասում էին։ Հասկացա, որ մեր դիկտատորը վախեցած է և ապրում է սարսափների մեջ, դիկտատորը նա է, ով ասում է, որ մարդկանց կփռի ասֆալտին և կծեփի պատերին։ Հասկացա, որ ասֆալտին ծեփում են նաև ոստիկանական ջոկատներին գործի դնելով։ Ընդհամենը պաշտպանում ենք մեր իրավունքները, ունենք բազմաթիվ ահազանգեր՝ սոցիալական ցանցերում և հեռախոսազանգերով։ Լինելով ավագանու նախկին անդամ, քաղաքացիները սովորաբար դիմում են մեզ, քանի որ նախկինում նրանց բարձրաձայնած հարցերը լուծել ենք»,- ասաց Սոնա Աղեկյանը

Նրա խոսքով՝ քաղաքային իշխանությունը լինելով սանմաքրման և աղբահանության թիվ մեկ պատասխանատուն, որևէ գործողություն չի անում քաղաքն աղբից ազատելու համար, այլ ընդհակառակը՝ փորձում է Երևանը վերածել մեծ աղբավայրի։ Ավելին՝ քաղաքապետն իր նախընտրած խոստումներից որևէ մեկը չի կատարել, ուստի որոշել են ակցիայի միջոցով քաղաքապետին հիշեցնել, որ, բացի մեծ պարգևավճարներ ստանալուց և ինքնապարգևատրվելուց, պետք է նաև աշխատեն։

«Մենք խաղաղ ակցիայի միջոցով փորձում ենք հիշեցնել և պարտադրել, որ քաղաքային իշխանությունը պետք է կատարի իր խոստումները և աշխատի։ Այսօր քաղաքապետարանում որևէ քայլ չէինք արել, ընդամենը տոպրակով աղբը տանում էինք, որպեսզի դնեինք մուտքի մոտ, մեզ ասացին՝ այն աղբարկղ նետենք, բայց այդ տարածքում աղբարկղ չկար։ Նրանք սարսափած էին, քանի որ մենք երկու հոգով էինք գնում, իսկ մեզ մոտեցել էին թվով մոտ 60 ոստիկաններ։ Մեզ ոստիկանական բաժին տարան՝ նշելով, որ պաշտոնատար անձի հրամանը չենք կատարել։ Մեզ ոստիկանությունում մեկ ժամ էլ չպահեցին, ասացին, որ երեք ժամ պետք է պահեն, ինձ պատասխանեցին, որ որևէ հանցակազմ ու հիմք չկա»,- շեշտեց Ս. Աղեկյանը։

Նա տեղեկացրեց, որ նման ակցիաները շարունակելու են, քանի որ քաղաքային իշխանություններին ցանկանում են ցույց տալ, որ քաղաքական կամք ունենալու դեպքում կարող էին այսօր աղբահանության խնդիրը լուծել, այդ թվում՝ վերելակների ու կանաչապատման, վերջինիս առումով վիճակը տխուր է, քանի որ որևէ ծառ այս ընթացքում չի տնկվել։

«Նրանք անգործության են մատնվել և չեն խոսում աղբահանության մասին, մինչդեռ աղբակույտերը նեխում են, նման փաստ երեկ մենք արձանագրել ենք Աջափնյակ համայնքում, երբ աղբակույտերն ինքնայրվում էին։ Սպասում են՝ մի քանի հոգի մահանա, նո՞ր խոսեն համաճարակի մասին, պետք է կանխարգելիչ աշխատանքներ տանեն։ Այսօր աղբի տոպրակը տարել էիք Առողջապահության նախարարություն, որպեսզի տանք լաբորատոր փորձաքննության, այն մեր մոտից չվերցրեցին՝ նշելով, որ մասնագետ չենք»,- ընդգծեց Սոնա Աղեկյանը։