Ռոբերտ Քոչարյանի խափանման միջոցը փոխած դատավոր Դավիթ Գրիգորյանին դատախազներն ինքնաբացարկ կհայտնեն

«Մարտի 1»-ի գործով մեղադրյալ Ռոբերտ Քոչարյանի խափանման միջոց կալանավորումը փոխելու վերաբերյալ որոշում կայացնող դատավոր Դավիթ Գրիգորյանին մեղադրող կողմն ինքնաբացարկի միջնորդություն կհայտնի:

Այս մասին Tert.am-ի հետ զրույցում ասել է ՀՀ գլխավոր դատախազության հանրային կապերի բաժնի պետ Արևիկ Խաչատրյանը:

«Գործով մեղադրող դատախազները միջնորդություն կներկայացնեն Երևան քաղաքի ընդհանուր իրավասության դատարանի դատավոր Դավիթ Գրիգորյանին ինքնաբացարկ հայտնելու վերաբերյալ: Բացի այդ, նշեմ, որ կալանքը փոխելու վերաբերյալ դատարանի որոշումը բողոքարկվելու է, բողոքը պատրաստվում է»,-ասաց Խաչատրյանը:

Հիշեցնենք, որ մայիսի 18-ին Երևան քաղաքի ընդհանուր իրավասության դատարանի դատավոր Դավիթ Գրիգորյանը փոխել էր Ռոբերտ Քոչարյանի խափանման միջոց կալանավորումը՝ Արցախի գործող և նախկին նախագահներ Բակո Սահակյանի և Արկադի Ղուկասյանի անձնական երաշխավորությամբ: Նշենք, որ «Մարտի 1»-ի գործից առանձնացված մասը ևս Դավիթ Գրիգորյանի վարույթում է: Նախնական դատական նիստի մեկնարկին Դավիթ Գրիգորյանին ինքնաբացարկի միջնորդություն էին հայտնել նաև Ռոբերտ Քոչարյանի պաշտպանները՝ գլխավորի դատախազի՝ դատավորների համար նախատեսված ծառայողական մուտքից մուտք գործելու հիմնավորմամբ: