Պետական գույքն իր ինքնարժեքի 10 տոկոսի գնով վաճառելու գործով Արման Սահակյանը շարունակում է մնալ վկայի կարգավիճակով
Պետական գույքն իր ինքնարժեքի 10 տոկոսի գնով վաճառելու գործով միակ մեղադրյալը շարունակում է մնալ ՀՀ կառավարությանն առընթեր Պետական գույքի կառավարման վարչության պետի նախկին տեղակալը։ Այս մասին «Փաստինֆո»-ն տեղեկացավ ՀՀ քննչական կոմիտեի հասարակայնության հետ կապերի և լրատվության բաժնի պետի պաշտոնակատար Նաիրա Հարությունյանից: Նրա խոսքով՝ մեղադրյալի նկատմամբ որպես խափանման միջոց է ընտրվել անձնական երաշխավորությունը։ Իսկ վարչության նախկին պետ Արման Սահակյանն ունի վկայի կարգավիճակ:
Հիշեցնենք, որ նա տեղակալը մեղադրվում է Ջրաձորի և Ամասիայի ջրանցքների օտարման գործով պաշտոնեական դիրքը չարաշահելու եւ կեղծիիքներին առնչություն ունենալու մեջ։
Քրեական գործը քննվում է ՀՀ ՔԿ ՀԿԳ քննության գլխավոր վարչության վարույթում։ Պաշտոնական հաղորդագրության համաձայն՝ Շիրակի մարզում գտնվող Ջրաձորի և Ամասիայի ջրանցքների, դրանց օգտագործման ու սպասարկման համար նախատեսված հողամասերի, 7060ք/մ թունելի օտարման ընթացքում չարաշահումներ են հայտնաբերվել։
Մասնավորապես՝ «Անի» ԲԲ ընկերության գլխավոր տնօրենը 2017 թվականի փետրվարի 2-ին գրավոր դիմում է ներկայացրել կառավարությանը՝ խնդրելով ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի հաշվեկշռում հաշվառված և անհատույց օգտագործման իրավունքով «Շիրակ» ջրօգտագործողների ընկերությանը հանձնված Շիրակի մարզի Ամասիայի համայնքում գտնվող 1882ք/մ մակերեսով Ջրաձորի ջրանցքը և դրա օգտագործման ու սպասարկման համար անհրաժեշտ 0.1968 հեկտար մակերեսով հողամասը, 5342ք/մ մակերեսով Ամասիայի ջրանցքը և դրա օգտագործման ու սպասարկման համար անհրաժեշտ 1.38 հեկտար մակերեսով հողամասը, 7060ք/մ թունելը, ջրանցքները սպասարկող կառուցվածքներն ուղղակի վաճառքի ձևով օտարել «Անի» ԲԲ ընկերությանը։
Դիմումի քննարկումն ու առաջարկությունների ներկայացումը կառավարության կողմից հանձնարարվել է ՀՀ Կառավարությանն առընթեր պետական գույքի կառավարման վարչությանը, որտեղ գույքի գնահատման պաշտոնական փաստաթղթերում մտցվել են ակնհայտ կեղծ տեղեկություններ՝ վերոնկարագրյալ գույքի արժեքը նշելով շուկայականից խիստ ցածր՝ 32.531.000 ՀՀ դրամ։
Կատարված կեղծ հաշվարկն ուղարկվել է նույն վարչության օտարման բաժին, որի հիման վրա կազմվել, ապա ՀՀ կառավարության կողմից 13.04.2017թ. հաստատված թիվ 372 Ա որոշմամբ թույլատրվել է 244.600.000 ՀՀ դրամ իրական արժեք ունեցող գույքն ուղղակի վաճառքի ձևով, կեղծ գնահաշվարկի արժեքի 75 տոկոսի չափով՝ 24.965.898 ՀՀ դրամով, օտարել «Անի» ԲԲԸ-ին։
Նշված գործարքի հետևանքով պետության օրինական շահերին պատճառվել է առանձնապես խոշոր չափերի՝ 160.754.694 ՀՀ դրամի գույքային վնաս և առաջացրել ծանր հետևանքներ։
Ըստ քրեական գործի տվյալների՝ կատարված կեղծիքների ժամանակ վարչության պետի պաշտոնակատարը պաշտոնապես եղել է տեղակալը, իսկ թե որքանով էր նա իրավասու նման զեղծարարության գնալ «ինքնագլուխ», Կառավարությունից եկած հանձնարարականը կատարել կեղծիքներով՝ այլ հարց է։ Համենայն դեպս՝ մեղադրանքն առաջադրված է միայն տեղակալին՝ ՀՀ քրեական օրենսգրքի 308-րդ հոդվածի 2-րդ մասով և 38-314-րդ հոդվածի 1-ին մասով։