Արդեն որոշումը կա. Նիկոլ Փաշինյանը՝ տույժ-տուգանքների, արագաչափերի եւ տեսախցիկների, եկամտահարկը նվազեցնելու մասին

Արդեն կա որոշում, ըստ որի ժամկետանց վարկերի տույժ-տուգանքները կզրոյացվեն։ Այս մասին Ֆեյսբուքի իր էջում պատասխանելով օգտատերերի հարցերին ասաց ՀՀ վարչապետ Նիկոլ Փաշինյանը։ «Եթե մարդը վերցրել է ասենք մեկ մլն դրամի վարկ եւ ինչ-ինչ պատճառներով չի կարողացել վճարել, եւ այդ վարկը տույժ-տուգանքներով հասել է 3 մլն-ի։ Մենք արդեն բանկերի հետ ունենք պայմանավորվածություն, որ ժամկետանց վարկերի տույժ-տուգանքները զրոյացվեն։ Դրա արդյունքում բանկերի եւ վարկառուի հարաբերությունները կվերադառնան զրոյական մակարդակի։ Դրանից հետո կսկսենք նաեւ վարկային պատմությունների մաքրման գործընթաց։ Սկզբնական շրջանում փոքր պոչ ունեցողների պատմությունը կմաքրվի, որ նրանք նոր վարկ ստանալու հնարավորություն ստանան, հետո այդ շրջանակը կլայնացվի»,-ընդգծեց Նիկոլ Փաշինյանը։ Պետք է քննարկել նաեւ արագաչափերի եւ տեսախցիկների գործունեությունը ժամանակավորապես դադարեցնելու հարցը, բայց կասեցնելու որոշում չի եղել, ասաց Նիկոլ Փաշինյանը։ Խոսելով եկամտահարկը նվազեցնելու մասին՝ տեղեկացրեց, որ այս հարցով ևս պատրաստվում են զբաղվել:  «Մենք առաջիկայում պատրաստվում ենք նաև եկամտային հարկի իջեցմանը, այս պահի պլանով իրավիճակը կմնա նույնը, պարզապես կուտակային բաղադրիչի մեջ 5%-ը կդառնա 2,5%: Այս համակարգը կգործի, քանի դեռ եկամտահարկի տոկոսները չեն իջել այնքան, որ համեմատելի լինեն մեր ժողովրդի ստացած աշխատավարձերին: Երբ որ եկամտահարկը իջնի, կուտակայինի տոկոսները նորից կհասնեն 5%-ի: Այս պահին մեր նպատակը՝ եկամտահարկը իջեցնել, որ կուտակայինը նորից դառնա 5%: Եկամտահարկի փոփոխոխության հետ կապված հույս ունենք ստվերը կրճատել, որի արդյունքում կարձանագրվեն աշխատավարձերի իրական չափերը: Ունենք գլոբալ խնդիր՝ ստվերը կրճատելով պետական եկամուտները ավելացնել: Մեր երկրի առավելագույն պրոբլեմը «փող չկա»-ն է, ես համոզված եմ, որ փող կա, պարզապես այդ փողը պետք է դնել օրինական ռելսերի վրա, որ դա ծառայի Հայաստանի զարգացմանը»: