Երևանի թիվ 19 պոլիկլինիկայի տնօրենը «Ելք»-ին. «Միգուցե, իրենք են սովոր կոնյակներով հարցեր լուծել»

Այսօր լրագրողների հետ հանդիպմանը Երևանի թիվ 19 պոլիկլինիկայի տնօրեն Սամվել Սարգսյանը հայտարարեց, թե իր դեմ արշավ են սկսել Երևանի ավագանու «Ելք» խմբակցության 4 անդամները՝ Դավիթ Խաժակյանը, Թեհմինա Վարդանյանը, Անի Խաչատրյանն ու Անի Սամսոնյանը, որոնք կանխամտածված ու միտումնավոր ապատեղեկատվություն են տարածում իր մասին:  «Անպատկառ ու անամոթաբար, իրականությանը չհամապատասխանող, ստահոդ տեղեկություններ են տարածում՝ իմ բարի համբավը վիրավորելու, աշխատանքային գործունեության վրա ստվեր գցելու միտումով: Միայն մեկ աշխատակից է բողոքել, իսկ մյուսների ձայնը հաշվի չեն առել: Ինչ-որ կոնյակների հետ են կապում, միգուցե, իրենք են սովոր կոնյակներով հարցեր լուծել, մեզ մոտ այդպես չէ: Մեզ մոտ յուրաքանչյուր ստորաբաժանումում ղեկավարի անմիջական ղեկավարմամբ է որոշվում, թե ով ինչ ժամանակ է գնում արձակուրդ, որից հետո տվյալները տարվում են կադրերի բաժին, ու կազմվում են ցանկերը»,- նշեց Սարգսյանը: Ինչպես ասաց՝ իր համար ծիծաղելի է ավագանու «Ելք» խմբակցության անդամների դիրքորոշումը:  «Քաղաքացին ծառայություն ստանալուց առաջ պարտավոր է և պետք է վճարի այդ ծառայության համար: Բժշկական հիմնարկներում պետպատվերից դուրս իրագործվող, վճարովի հիմունքներով օգնություն կա: Շուրջ 130 բժիշկ-մասնագետից վճարովի հիմունքներով բուժսպասարկում իրականացնում է 34-40 մասնագետ: Այդ 34-40 աշխատակիցները 5.000 դրամից սկսած մինչև մի քանի հարյուր հազար դրամ վճարում են կատարում: Ամեն բան կախված է այդ մասնագետի պահանջարկից, մուտքագրված վճարներից 50-60  տոկոսն էլ հավելյալ գումարվում է աշխատավարձին»,- պարզաբանեց Սամվել Սարգսյանը: