Նիկոլ Փաշինյան. «ՀՔԾ որևէ քննիչի սենյակում որևէ բարձրաստիճան պաշտոնյայի լուսանկար չպետք է լինի»

ՀՀ վարչապետ Նիկոլ Փաշինյանը Հատուկ քննչական ծառայության աշխատակազմին ներկայացրել է կառույցի նորանշանակ պետ Սասուն Խաչատրյանին: Ապա վարչապետը մի քանի դիտարկումներ է արել՝ ՀՔԾ գործունեության հետ կապված:  «ՀՔԾ որևէ քննիչի սենյակում որևէ բարձրաստիճան պաշտոնյայի լուսանկար չպետք է լինի, որովհետև ՀՔԾ-ն զբաղվում է այնպիսի գործերով, որոնք կարող են նաև առնչություն ունենալ այդ պաշտոնյայի հետ։ ՀՔԾ քննիչների սենյակում պետք է լինեն ՀՀ զինանշանը և դրոշը, և այս սիմվոլները պետք է արտահայտեն այն գործառույթը, որ իրականացվում է ՀՔԾ-ի կողմից»,- ասել է նա: Կառավարության ղեկավարն անդրադարձել է նաև կառույցի առջև դրված գլխավոր խնդիրներից մի քանիսին. «Մենք ստանձնել ենք պարտավորություն, որ ի վիճակի լինենք ապահովել ազատ, արդար, թափանցիկ ընտրություններ: Այս առումով կարևոր է ընտրական հանցագործությունները պատշաճ քննության արժանացնելը, քանի որ սա վերաբերում է իրավապահ համակարգի հեղինակությանը: Մյուս ամենակարևոր գործերից մեկը, որ ՀՔԾ-ն պետք է անի, դա Մարտի 1-ի ոճրագործության բացահայտումն է: Երբ ասում ենք՝ չկան սահմանափակումներ, նկատի ունենք, որ դրանք չկան ու եթե նախկինում եղել են գործեր, որ ինչ-ինչ պատճառներով չեն ընթացել, հույս ունեմ, որ ՀՔԾ-ն կանդրադառնա դրանց»,- ընդգծել է Փաշինյանը: Հիշեցնենք, որ ՀՔԾ նորանշանակ պետ Սասուն Խաչատրյանը «Մհեր Խաչատրյան և գործընկերներ» փաստաբանական գրասենյակի տնօրենն է եղել: Հունիսի 8-ին, կառավարության որոշմամբ, Վահրամ Շահինյանն ազատվել էր Հատուկ քննչական ծառայության պետի պաշտոնից` սեփական դիմումի համաձայն։