Կարապետյանն ու Փաշինյանը հանդիպել են.էլեկտրաէներգիայի սակագինը կնվազի՞

Կառավարության վերջին նիստին էներգետիկ ենթակառուցվածքների և բնական պաշարների նախարար Արթուր Գրիգորյանը տեղեկացրեց, որ քննարկվում է անապահով խավի համար էլ. էներգիայի սակագնի 10 դրամով իջեցումը: Չնայած, սակագների իջեցման հարցը կարգավորում է հանրային ծառայությունները կարգավորող հանձնաժողովը, սակայն նախարարի խոսքով  քննարկում են ունեցել ՀԷՑ-ի հետ և պայմանավորվել, որ ընկերությունն իր շահույթի հաշվին անապահով խավի համար սակագինը կիջեցնի 10 դրամով: Նախարարը նաև նշեց, որ խոսքը գնում է տարեկան մոտ 2 միլիարդ դրամի մասին և եթե որոշումը հաստատվի, ապա հուլիսի 1-ից ուժի մեջ կմտնի: Մեր ունեցած տեղեկություններով,այս հարցին լուծում տալու նպատակով երեկ հանդիպում է տեղի ունեցել ՀՀ վարչապետ Նիկոլ Փաշինյանի և  «Տաշիր խմբի» սեփականատեր Սամվել Կարապետյանի միջև: Հիշեցնենք,որ օրեր առաջ լրատվամիջոցները գրել էին,որ «Էլեկտրաէներգիայի սակագինը նվազեցնելու ՀԷՑ սեփականատերերի պատրաստակամությունը պայմանավորված է վարչապետ Նիկոլ Փաշինյանի և «Տաշիր խմբի» սեփականատեր Սամվել Կարապետյանի բանակցություններով: Միայն թե սակագինը կարելի է իջեցնել ոչ միայն անապահովների համար, այլև ամբողջ բնակչության և նաև տնտեսության համար՝ հնարավորություն տալով, որ այն լինի մրցունակ և զարգացման հեռանկար ունենա: Դրա դիմաց «Տաշիր խումբը» և նրա սեփականատերը ակնկալում են, որ Հայաստանի կառավարությունը չի խոչընդոտի նախկին ծրագրերի իրականացմանը, որոնցից ամենակարևորը թերևս Շնող ՀԷԿ-ի կառուցումն է, որի ֆինանսավորման մեջ ներգրավված են միջազգային ֆինանսական ինստիտուտներ: