Վանո Սիրադեղյանի գործով ցմահ դատապարտյալը հացադուլ է հայտարարել

scannews.am-ը գրում է. Նուբարաշեն ՔԿՀ-ում պատիժը կրող ցմահ դատապարտյալ Արմեն Տեր Սահակյանը երեկ՝ հունիսի 6-ին անժամկետ հացադուլ է հայտարարել: «Պահանջում եմ փոխել իմ հանդեպ կայացրած վճիռը: Այդ վճիռը ժամանակին թելադրվել է Բաղրամյան 26-ի կողմից: Ես մեղավոր էի մի բանում՝ Վանո Սիրադեղյանի դեմ ցուցմունք չեմ տվել: Սա հենց ինձ մահապատժի դատապարտելու գլխավոր պատճառն էր: Երկրորդը՝ Քոչարյանը իբր ներում շնորհեց, երբ մահապատիժը փոխարինեց ցմահ ազատազրկմամբ: Նա այդ իրավունքը չուներ: Երրորդը՝ 15 տարի հետո հնարավոր էր դիմել վաղակետ ազատման համար ու անարդարացիորեն այդ ժամկետը դարձավ 20 տարի»,- ScanNews.am-ի թղթակցին Արմեն Տեր Սահակյանի հաղորդագրությունը փոխանցեց որդին՝ Աբգար Տեր Սահակյանը: Որդու փոխանցմամբ՝ Արմեն Տեր Սահակյանը պահանջում է հանդիպում Արդարադատության նախարարության պաշտոնյաի, ՀՀ Գլխավոր դատախազության ներկայացուցչի, Հելսինկյան կոմիտեի ներկայացուցչի և Մարդու իրավունքի պաշտպանի գրասենյակի ներկայացուցչի հետ: Ցմահ դատապարտյալը նշում է, որ ինքը տարիներ շարունակ տառապել է և վաղուց է վճարել գործած և չգործած հանցանքի համար: Նշենք, որ Արմեն Տեր Սահակյանը բազմիցս նշել է, որ շատ կարևոր գաղտնիք կբացահայտի, որը բազմաթիվ պաշտոնյաների համար կարող է ճակատագրական լինել: Հիշեցնենք, որ Արմեն Տեր-Սահակյանը 20 տարի և ավել պատիժը կրելուց հետո դիմել էր դատարան` պահանջելով վերացնել պայմանական վաղաժամկետ ազատ արձակելու հարցով միջնորդագիր ներկայացնելը հետաձգելու վերաբերյալ քրեակատարողական հիմնարկի որոշումը: Նշենք, որ Արմեն Տեր-Սահակյանը Հանրապետության նախկին ՆԳ նախարար Վանո Սիրադեղյանի մերձավոր շրջանակներից էր, ով համարվել է բանդայի պարագլուխ և 1998թ-ին սպանությունների, զինված բանդայի կազմավորման համար մահապատժի փոխարեն ցմահ ազատազրկման է դատապարտվել։ Լուսին Ղազարյան