Ավելի լավ է լինել հալածվող ընդդիմություն, քան կառավարության մեջ տնփեսա. Աշոտյան

«Վարչապետի ելույթը դուրս եկավ, լավ խոսեց, ավելի լավ խոսեց, քան ծրագիրն էր ներկայացաված։ Ելույթն ավելի լավն էր, քան հարցուպատասխանը, հարցուպատասխանն էլ ավելի լավն էր, քան ծրագիրը»,- այսօր խորհրդարանում նոր կառավարության ծրագրի քննարկմանն ասաց Հանրապետական խմբակցության պատգամավոր Արմեն Աշոտյանը,-փոխանցում է Panorama.am-ը։ Նա իր խոսքում նշեց, որ կայուն զգացողություն ստացավ, որ ծրագիրը վարչապետի գրչի տակով չի անցել, հակառակ պարագայում բազմաթիվ գոնե ոճաբանական խնդիրներ վստահաբար լուծված կլինեին։ Ինչ վերաբերում է ծրագրի բովանդակությանը, Աշոտյանն ասաց, որ այնտեղ ոչ մի ժամկետ, ոչ մի ցուցիչ չկա. «Ոչ մի բանով ձեզ չեք պարտավորեցրել, ճիշտ եք արել, ինչու մեզ օգնեք, հետո մենք չափենք՝ լավ եք աշխատել, թե ոչ։ Շատ լավ է ձևակերպված արցախյան հարցի լուծումը, որևէ մեկը ոչ մի բան չի հասկանում այդ ձևակերպումից, քանի որ Ստեփանակերտի մայիսի 9-ի Ձեր հայտարարությունները և ներկայացված տեքստը համահունչ չէին,  Ձեր այսօրվա հարցուպատասխանին հնչեցրած տեսակետը համահունչ չէր այն երկուսին։ Խնդրում եմ՝ տվեք Արցախյան հիմնախնդրի այսօրվա իշխանական բանաձևը, որ մենք անկախ մեր քաղաքական տարաձայնություններից այն առաջ տանենք»։ Աշոտյանը ծրագրում մի վտանգավոր բան էլ էր նկատել, որը խնդրեց ուղղել մինչև ծրագրի քվեարակությունը։ «Ես միշտ գիտեի, որ արցախյան հակամարտությունը ծագել է, որովհետև Ադրբեջանը հարձակվել է Արցախի և Հայաստանի վրա, քանի որ Արցախի ժողովուրդը կյանքի է կոչել ինքնորոշման իր իրավունքն ազատ ապրելու։ Ոնց կարելի է գրել, որ կոնֆլիկտի հիմնական հիմնական կողմն Արցախն է։ Խնդրում եմ հանեք «հիմնական կողմ» արտահայտությունը»,- ասաց պատգամավորը։ Աշոտյանը խնդրեց ծրագրում ավելացնել նաև ներառական կրթության, եվրապական բարձրագույն կրթական տարածքին ինտեգրվելու խնդիրը, քանի որ առանց սրանց ոլորտը չեն կարող բարեփոխել։ «Տնտեսական առաջնահերթությունների բլոկը պարզապես Նիկոլ Փաշինյանի մայիսի 8-ի ելույթից քոփի փեսթ արած առաջնահերթություններ են։ Սիրելի նախարարներ, այն ինչ որ կարելի է վարչապետին, չի կարելի վարչապետի ցլերին, հունական ասացվածքով ասած, աշխատեիք մի քիչ տեքստի վրա։ Ի՞նչ եք պատկերացնում, հեղափոխական տուրիզմի զարգացման հեռանկարը ո՞րն է, հարգում եմ ձեր կատարած աշխատանքը, ընդունում եմ իշխանափոխության արդյունքները, չեմ հեգնում, կարո՞ղ է Մադամ Տյուսոյի հետ մոմե արձանների սրահ բացեք՝ հեղափոխությանը նվիրված։ Չեմ հասկանում, Գառնին, Գեղարդը, Սևանը, Ծաղկաձորը, Մատենադարանը ձեզ ի՞նչ են արել, որ տուրիզմի հիմնական մասը դրել եք բացառապես այս ուղղության վրա»,- ասաց Աշոտյանը։ Անդրադառնալով պատգամավոր Նաիրա զոհրաբյանին ելույթին՝ նա նշեց. «Նման ելույթներով ձեր քաղաքական թիմին ավելի շատ վնաս եք տալիս, քան օգուտ։ Ավելի լավ է լինել հալածվող ընդդիմություն, քան կառավարության մեջ տնփեսայի կարգավիճակում հանգրվանած քաղաքական ուժ»։