Գազի եւ էլէներգիայի սակագների հարցով լրջորեն զբաղվում ենք. Փաշինյան
Հնարավո՞ր է 3 տարի հետո քաղաքացիների համար գազի և էլեկտրաէներգիայի սակագնի իջեցում ապահովել, ԱԺ-ում կառավարության ծրագրի ներկայացման ժամանակ ՀՀ վարչապետ Փաշինյանին հարց ուղղեց «Ծառուկյան» խմբակցության պատգամավոր Վարդան Բոստանջյանը։ Փաշինյանը նշեց, որ ՌԴ նախագահի հետ հանդիպմանը բարձր է գնահատել փաստը, որ ՌԴ-ն ՀՀ-ին բավականին էժան գնով է գազ մատարակարարում, մինչդեռ խնդիրն այլ է: Ինչպես հայտնեց՝ գազի եւ էլեկտրաէներգիայի սակագների հետ կապված խնդիր կա եւ իրենք դրանով զբաղվում են: «Ես ասացի, որ ՀՀ քաղաքացիների համար էականը ոչ թե այն է, թե ինչ գնով է ՌԴ-ն ՀՀ-ին գազ մատակարարում, այլ թե ինքն ինչ գնով է այդ գազն իր տանը սպառում, իսկ ՀՀ քաղաքացին այսօր չի զգում, որ ինքը Ռուստաստանից էժան գազ է ստանում։ Այստեղ կարող են լինել որոշակի անարդյունավետ կառավարման՝ ընդհուպ կոռուպցիոն ռիսկեր։ Կարծում եմ՝ նաև ՌԴ իշխանությունը ըմբռնումով է մոտենում, որ մենք այս հարցերով լրջությամբ զբաղվենք», - նշեց նա։ Փաշինյանն ասաց, որ նույնպիսի խնդիր կա նաեւ էլեկտրաէներգիայի հարցում. «Կարծում եմ, Ռուսաստանն էլ ըմբռնումով է մոտենում, որ մենք այս հարցերով զբաղվենք եւ տեսնենք, թե ինչ է տեղի ունենում: Չեմ ուզում ժամկետից շուտ հայտարարություններ անել, բայց ուզում եմ հավաստիացնել, որ մենք լրջորեն այդ հարցերով զբաղվում ենք եւ հույս ունենք, որ այդտեղ կունենանք կոնկրետ արդյունքներ»:
Հետևեք մեզ Viber-ում
