Մարտի 1-ը բացահայտել ու իրենց անունը ոսկե տառերով գրել ՀՀ պատմության մեջ.Փաշինյանի հանձնարարականը
«Կարեւորագույն խնդիրներից է 2008-ի մարտի 1-ի սպանությունների բացահայտումը: Ոչ բռնի թավշյա ժողովրդական հեղափոխություն իրականացրածներս, բարոյական պարտք ունենք Մարտի 1-ի զոհերի հարազատների առաջ, քանի որ եթե չլիներ 2008-ի մարտի 1-ը, վերջին մեկուկես ամսվա ընթացքում քաղաքական իրադարձությունների ժամանակ դժվար կլիներ խուսափել արյունահեղությունից: Մարտի 1-ի դաժան փորձը իշխանությանը պարտադրեց առավել զգուշավոր լինել ժողովրդական փողոցային վենդետաներից խուսափելու համար: Այդ փորձը մեզ օգնեց քաղաքական առաջնորդության պատասխանատվության լրջությունը գիտակցելու եւ շարժումը ոչ բռնի պայքարի տրամաբանությամբ տանելու հարցում: 2008-ի Մարտի 1-ի զոհերի քաղաքացիական վաստակի կարեւորագույն գնահատականներից մեկը պիտի լինի սպանությունների բացահայտումը»,-ԱԺ արտահերթ նիստում հայտարարեց ՀՀ վարչապետ Նիկոլ Փաշինյանը: «Հանձնարարականներ եմ տվել իրավապահ մարմիններին: Կարծում եմ, իրավապահ այն համակարգը, այն մարմինը, որը կբացահայտի Մարտի 1-ի սպանությունները, իր անունը ոսկե տառերով կգրի հայ ժողովրդի եւ Հայաստանի պատմության մեջ եւ հակառակը՝ իրավապահ համակարգի աշխատանքը բավարար գնահատել չեմ կարող այնքան ժամանակ, քանի դեռ Մարտի 1-ի սպանությունները բացահայտված չեն»,-ասաց նա:
Հետևեք մեզ Viber-ում
