Մանե Թանդիլյանի առաջին ահազանգը (video)
«Մեր նախարարության գործառույթներից է զբաղվածության ապահովման հարցը, և այդ ուղղությամբ ծրագրային փոփոխություններ ենք անում՝ հասցեականությունը բարձրացնելու, կադրային լուծումներ գտնելու ուղղությամբ: Գլոբալ առումով, սակայն, մենք լուրջ խնդիր ունենք այստեղ, հստակ տեսում ենք, որ ունենք աշխատատեղեր, բայց չունենք հստակ աշխատաշուկա, կադրեր, որոնք կապահովեն բացերը: Իմ առաջին ահազանգն է, որ չի կարող նման բան լինել, երբ ունենք գործազուրկների թիվ և ունենք բաց աշխատատեղեր, որոնք չեն համալրվում»,-նման պատասխան տվեց ՀՀ Աշխատանքի և սոցիալական հարցերի նախարար Մանե Թանդիլյան,երբ «Հանրապետական» խմբակցության պատգամավոր Մարգարիտ Եսայանը հետաքրքրվեց, թե աշխատանքի ապահովման խնդիրները լուծելու ինչ տեսլական ունեն:
Նշենք,որ Սոցիալական և ֆինանսաբյուջետային հարցերի մշտական հանձնաժողովների համատեղ նիստում քննարկվում է 2017թ. պետական բյուջեի կատարման մասին տարեկան հաշվետվությունը:
Խնդիրը քննարկվել է նաև կրթության և գիտության նախարարի հետ, և այս հարցում ունեն համախոհություն,ասաց նախարարը:
Մարգարիտ Եսայանը նաև հետաքրքրվեց, թե ինչ աշխատանք է տարվում լսողական խնդիրներ ունեցող անձանց լսողական սարքերով ապահովելու համար: Նա օրինակ բերեց, որ վերջերս անհասկանալի ոգևորություն կար հասարակության կողմից, երբ «ոմն անձ» հայտարարել էր, թե ընդամենը 100 լսողական սարք է նվիրում:
«Ես գոնե տեղյակ եմ, որ պետությունը կատարում է իր պարտավորությունը գոնե լսողական սարքերի մասով, և ասացեք՝ այդ հարյուր սարքը որքանո՞վ է թեթևացնում խնդիրը»,-հարցրեց նա:
Մանե Թանդիլյանը նշեց, որ լսողական սարքերի մասով իսկապես կան դժգոհություններ, որ տրամադրվող սարքերը հարմար չեն:
«Այդ առումով պետք է շարունակել գործընթացը, հավաստագրերի միջոցով տրամադրել սարքավորումները»,-նշեց նախարարը:
Հետևեք մեզ Viber-ում
