Վահրամ Բաղդասարյանը՝ ՀՀԿ-ն լքած պատգամավորների մասին (video)

Ցանկացած քաղաքական ուժ պետք է պատրաստ լինի և՛ իշխանություն, և՛ ընդդիմություն լինելու: Այս մասին այսօր՝ հունիսի 5-ին, ԱԺ-ում լրագրողների հետ զրույցում նշեց ԱԺ ՀՀԿ խմբակցության ղեկավար Վահրամ Բաղդասարյանը՝ անդրադառնալով հարցին, որ արդեն թվով 4-րդ պատգամավորն է լքում ՀՀԿ խմբակցությունը: «Եթե դուք մի փոքր պատմական էքսկուրս կատարեք, կտեսնեք, որ աշխարհում երբևէ նման դեպք չի եղել, որ իշխանություն ունենա մեկ ուժ, իսկ Ազգային ժողովում մեծամասնություն ունենա մեկ այլ քաղաքական ուժ: Եվ սա վկայում է Հանրապետական կուսակցության միասնականության մասին: Մենք խմբակցության ոչ քաղաքական թևին ասել ենք, որ եթե իրենց խանգարող հանգամանքներ կլինեն, ազատ են, կարող են գնալ: Մենք որևէ մեկից կառչած չենք»,- ասաց Վահրամ Բաղդասարյանը: Անդրադառնալով խմբակցությունը լքած պատգամավորներ Ֆելիքս Ցոլակյանի, Շիրակ Թորոսյանի, Արթուր Գևորգյանի ու Արման Սահակյանի հարցին՝ ասել է, որ իրենք այդ հանգամանքը նորմալ են համարում և ոչ հիվանդագին: «Ֆելիքս Ցոլակյանը մայիսի 1-ից սիրողական մակարդակով էր խմբակցության անդամ: Նա արդեն ասել էր, որ ուզում է դիմում գրի և դուրս գա: Մենք հորդորեցինք, որ եթե լինեն կրկնություններ, մեր դիրքորոշումներին համահունչ չի գործի, մենք հարցը նորից կվերանայենք: Նա իմ հետ հեռախոսազրույց է ունեցել և ասել, որ, հավանաբար, ավելի լավ կլինի, որ դիմում գրի»,- վստահեցրեց նա: նչ վերաբերում է  Շիրակ Թորոսյանին, Բաղդասարյանը նշել է, որ նա չի հեռացել, այլ իրենք են հեռացրել: Իսկ ահա Արթուր Գևորգյանի ու Արման Սահակյանի համար տեղեկացրեց, որ նրանք խմբակցության ոչ քաղաքական թևն էին ներկայացնում և նրանց հեռանալու մեջ իրենք խնդիր չեն տեսնում: