Տեղի ունեցավ Արտաշես Կարապետյանի հոբելյանական համերգ-երեկոն

Երեկ՝ հունիսի 4-ին, Ա. Սպենդիարյանի անվան օպերայի և բալետի ազգային ակադեմիական թատրոնում տեղի ունեցավ ՀՀ մշակույթի ժողովրդական գործիչ, Արտաշես Կարապետյանի հոբելյանական երեկոն՝ նվիրված նրա ծննդյան 90 և ստեղծագործական գործունեության 75-ամյակին: Երեկոյի ընթացքում ցուցադրվեցին վարպետի բալետմայստերական, բանահավաքչական գործունեությունը ներկայացնող տեսանյութեր: Հայկական ժողովրդական պարերի հմուտ գիտակին իրենց ողջույնն ու շնորհավորանքը բերեցին Թ. Ալթունյանի անվան երգի-պարի պետական անսամբլը, «Կարապետյաններ» պարային համույթը, Վանաձորի «Հորովել» երգի-պարի ազգագրական համույթը, ինչպես նաև՝«Բարեկամություն», «Մարաթուկ» , «Բերդ» պարային անսամբլները: Վարպետին իր կատարումով շնորհավորելու էր եկել նաև ՀՀ վաստակավոր արտիստ Ռուբեն Մաթևոսյանը. «Ես խոնարհվում եմ Ձեր տաղանդի ու աշխատասիրության առջև: Դուք իսկական օրինակ եք շատերի համար» ,-ասաց Մաթևոսյանը՝ հավելելով, որ իր և Կարապետյանի բարեկամությունը համարում է աստվածային շնորհ: Ռուբեն Մաթևոսյանը պատրաստակամություն հայտնեց նույն եռանդով և խանդավառությամբ իր շնորհավորանքը բերել նաև վարպետի 100 ամյակին: Համերգի ընթացքում Ա. Կարապետյանը պարգևատրվեց ազգային ժողովի հուշամեդալով, ՀՀ սփյուռքի նախարարության Ոսկե մեդալով, Երևանի քաղաքապետի ոսկե մեդալով: Մշակույթի փոխնախարարնն էլ ընթերցեց ՀՀ մշակույթի նախարար Լիլիթ Մակունցի շնորհավորական ուղերձը: Հոբելյանի կապակցությամբ մշակույթի գործչին Ազատ ղարիբյանի անվան հուշամեդալով պարգևատրեց «Վանուշ Խանամիրյանի անվան» պարարվեստի գործիչների միավորումը: Իսկ Հայաստանի ազգային պարարվեստի եւ պարագետների միությունը պարգևատրեց ազգային պարագետների միության ոսկե մեդալով: Հիշեցնենք նաև, որ 75 տարվա բեղուն գործունեության ընթացքում Արտաշես Կարապետյանը պարգևատրվել է ՀՀ մշակույթի նախարարության Ոսկե մեդալով, արժանացել նաեւ՝ «Հայրենիքին մատուցած ծառայությունների համար» 1-ին աստիճանի մեդալի:Իսկ անցած տարի արժանացել է Ժողովրդական արտիստի պատվավոր կոչմանը: Նշենք, որ հիանալի մանկավարժ է և հայկական ժողովրդական պարերի հմուտ գիտակ Արտաշես Կարապետյանի ապագայի համար ամենամեծ դերակատարումն ուեցել է հայրը՝Հակոբ Կարապետյանը, որի առնական պարը փոքրուց ոգևորել և ուժ է տվել Արտաշեսին: 1943թ. դեռևս 15-ը չբոլորած պատանին ընդունվել է Թաթուլ Ալթունյանի ղեկավարած ժողովրդական երգի-պարի անսամբլ: Հետագայում՝ 1974-թ-ից , հանդիսացել է անսամբլի պարային խմբի ղեկավարն ու բալետմայստերը: 1980թ. աշխատել է որպես մշակույթի նախարարության ժողստեղծագործության աշխատանքների գիտամեթոդական կենտրոնի պարարվեստի բաժնի բալետմայստեր: Հանդիսացել է նաև «Մարաթուկ» համույթի պարուսույցը մինչև 2014թ: Պարախմբում բեմադրել է բազմաթիվ պարեր, որոնք կատարվել և այսօր էլ կատարվում են աշխարհի տարբեր բեմերում: Նա գյուղից գյուղ ընկած հավաքել ու գրանցել է շուրջ 250 պար: Ա. Կարապետյանը 1988թ-ից առ այսօր դասավանդում է Խ. Աբովյանի անվան հայկական պետական մանկավարժական համալսարանում՝ բալետմեյստերի վարպետություն և ժողովրդական պարեր առարկաները: Պերճուհի Գևորգյան