Իսրայելի ոստիկանությունը Նաթանյահուի երկու զինակիցների է ձերբակալել կոռուպցիայի կասկածանքով

Իսրայելական ոստիկանությունն անվանել է վարչապետ Բենիամին Նեթանյահուի երկու աջակիցների անունները, որոնք ձերբակալվել են կոռուպցիայի կասկածով լայնամասշտաբ հետաքննության ընթացքում, հայտնում է «Интерфакс»-ը՝ հղում անելով Associated Press-ին։ Ոստիկանությունը տվել է Կապի նախարարության նախկին գլխավոր տնօրեն Շլոմո Ֆիլբերի և Նեթանյահուի նախկին մամուլի քարտոււղար Նիրա Հեֆետցայի անունները։Նրանք կասկածվում են կոռուպցիոն սխեմային մասնակցության մեջ, որի նպատակը եղել է Իսրայելի վարչապետի գործունեության դրական լուսաբանումը ԶԼՄ-ներում: AP-ի տվյալներով՝ կոնկրետ այս գործով ոստիկանությունը դեռեւս չի նշել իր՝ Նաթանյահուի անունը, բայց սպասվում է, որ վարչապետը կհարցաքննվի: Ավելի վաղ Իսրայելի ոստիկանությունը պահանջել է, որ վարչապետ Բենիամին Նաթանյահուին մեղադրանքներ առաջադրվեն կաշառակերության եւ վստահության կորստի երկու դեպքերի կապակցությամբ: Ոստիկանները Նաթանյահուի գործը հետաքննել են 14 ամիս եւ հայտարարել, որ իրենք բավականաչափ ապացույցներ ունեն՝ մեղադրանքներ առաջադրելու կաշառքի ու «նվերների գործով» եւ «Եդիոթ Ահրոնոթի գործով» վստահության կորստի կապակցությամբ: Հետաքննության վարկածով՝ առաջին դեպքում վարչապետն արժեքավոր նվերներ է ստացել գործարարներից, երկրորդ դեպքում «Եդիոթ Ահրոնոթի» հրատարակիչ Առնոն Մոզեսի հետ համաձայնության է եկել, որ նա տեղեկատվական աջակցություն ապահովի քաղաքական նպատակների հասնելու համար: Պետական դատախազները կվերլուծեն ապացույցները եւ կորոշեն, թե հարկ կա արդյոք մեղադրանքներ առաջադրելու Բենիամին Նաթանյահուին, հաղորդել է «Ինտերֆաքս»-ը: