Ալաշկերտն ունի շատ վտանգավոր հարձակման գիծ․ Կլուժի գլխավոր մարզիչ

Այսօր՝ հուլիսի 30-ին, «Ալաշկերտը» ՈւԵՖԱ Կոնֆերենցիաների լիգայի երկրորդ փուլի պատասխան խաղում կհյուրընկալվի ռումինական «Կլուժին»։ Այս մասին տեղեկանում ենք armsport.am կայցիք։

Նախախաղային ասուլիսի ժամանակ «Կլուժի» գլխավոր մարզիչ Անտոնիո Ֆոլյան խոսել է թիմի տրամադրվածության, որակավորման շանսերի և «Ալաշկերտի» կողմից սպասվող վտանգի մասին։

«Թիմը երջանիկ է, քանի որ մենք լավ, վստահ հաղթանակ ենք տարել Ռումինիայի առաջնությունում։ Հաջողությունից հետո աշխատելը միշտ ավելի հեշտ է։ Հիմա պետք է կենտրոնանանք և շարունակենք մեր աշխատանքը նույն ոգով։

Նման հանդիպումներում ես միշտ զգուշավոր եմ: Մեր միակ իրական առավելությունն այն է, որ խաղալու ենք սեփական երկրպագուների աջակցության ներքո, ինչը խիստ կարևոր է: Մնացած առումներով ամեն ինչ բաց է։ Հաշիվը 1:1 է, և մենք պետք է շատ բարձրորակ հանդիպում անցկացնենք, որպեսզի կարողանանք նվաճել հաջորդ փուլի ուղեգիրը։

Սովորություն չունեմ անվանական առանձնացնել մրցակցի խաղացողներին, բայց կկրկնեմ այն, ինչ ասել էի դեռևս առաջին խաղից առաջ։ Նրանք շատ հզոր հարձակման գիծ ունեն՝ արագ անցումներով և ուղղահայաց խաղով աչքի ընկնող ֆուտբոլիստներով։ Նրանք նաև լավ կիսապաշտպանություն ունեն, և եթե մենք մեր մակարդակի վրա չլինենք, անպայման բարդությունների կբախվենք։

Մենք պետք է պատրաստ լինենք իրադարձությունների ցանկացած զարգացման: Իհարկե, եթե ինձ ընտրության հնարավորություն տրվեր, կգերադասեի հաղթել հիմնական 90 րոպեների ընթացքում: Բայց անկախ նրանից, թե ինչ տեղի կունենա վաղը, մենք որպես միասնական թիմ պատրաստ կլինենք դրան»,- եզրափակել է Անտոնիո Ֆոլյան:

Հիշեցնենք, որ Հայաստանում կայացած առաջին դիմակայությունն ավարտվել էր մարտական ոչ-ոքիով՝ 1:1։ Հանդիպումը կկայանա Երևանի ժամանակով 22։30-ին։