Իրանի ԱԳ փոխնախարարը Ռուսաստանի և Չինաստանի դեսպանների հետ քննարկել է ԱՄՆ-ի հետ հուշագրի նախագիծը

Թեհրանում տեղի է ունեցել Իրանի արտաքին գործերի փոխնախարարի հանդիպումը Ռուսաստանի և Չինաստանի դեսպանների հետ, որի ընթացքում քննարկվել են Իրանի և ԱՄՆ-ի միջև փոխըմբռնման հուշագրի նախագծի շուրջ վերջին զարգացումները։

Իրանի արտաքին գործերի փոխնախարար Քազեմ Ղարիբաբադին X սոցիալական ցանցի հրապարակման մեջ հայտնել է, որ Թեհրանում Ռուսաստանի և Չինաստանի դեսպանների հետ հանդիպման ընթացքում կողմերը կարծիքներ են փոխանակել «Իսլամաբադի հուշագրի» նախագծի հետ կապված վերջին փոփոխությունների վերաբերյալ։

Նրա խոսքով՝ Իրանի, Չինաստանի և Ռուսաստանի ռազմավարական գործընկերությունը, ինչպես նաև երեք երկրների միջև համակարգումը, կշարունակվի և կամրապնդվի։

Բանակցություններն ընթանում են համաձայնագրի նախագծի շուրջ ակտիվ դիվանագիտական խորհրդակցությունների ֆոնին, որը քննարկվում է Պակիստանի միջնորդությամբ։ Ավելի վաղ Պակիստանի վարչապետ Շեհբազ Շարիֆը հայտնել էր, որ կողմերը, իբր, մոտեցել են շրջանակային խաղաղության համաձայնագրի ձեռքբերմանը, իսկ դրա վերջնական տարբերակը կարող է լինել առաջիկա 24 ժամվա ընթացքում՝ հետագա էլեկտրոնային ստորագրմամբ և տեխնիկական բանակցություններով։

Դրանից առաջ Իրանի արտաքին գործերի նախարար Աբաս Արաղչին նշել էր, որ Թեհրանը և Վաշինգտոնը կարող են առաջիկա օրերին հայտարարել նախնական փոխըմբռնման մասին, սակայն ընդգծել էր, որ գործընթացը դեռ ավարտված չէ։ Նրա խոսքով՝ քննարկվող փաստաթուղթը 14 կետից բաղկացած հուշագիր է, որը պետք է հիմք դառնա հետագա բանակցությունների համար։

Նա հավելել է, որ հետագա փուլերում նախատեսվում է քննարկել պատժամիջոցների վերացումը, միջուկային դոսյեն, տնտեսական վերականգնումը և այլ հարցեր, ընդ որում՝ Իրանը պնդում է պայմանավորվածությունների պահպանման երաշխիքների և իր ինքնիշխանության նկատմամբ հարգանքի վրա։