Իրանի դեմ բարդ տնտեսական պատերազմ է մղվում․ Մասուդ Փեզեշքիան
Իրանի նախագահ Մասուդ Փեզեշքիանը հայտարարել է, որ երկրի դեմ «բարդ տնտեսական պատերազմ» է մղվում, որն ուղղված է հիմնական ռեսուրսների մատակարարման խաթարմանը և հասարակական դժգոհության առաջացմանը, հայտնում է Tasnim-ը:
Ելույթ ունենալով Պաշտպանության նախարարության և Էներգետիկայի նախարարության փոխգործակցության հարցերով խորհրդակցության ժամանակ՝ նա ընդգծել է, որ տնտեսական ճնշման ժամանակակից ձևերն ավելի բարդ են, քան ուղղակի ռազմական դիմակայությունը:
Իրանի նախագահի խոսքով՝ արտաքին ուժերը ձգտում են խախտել բնակչությանը ջրով, էլեկտրաէներգիայով, գազով և կենսական նշանակություն ունեցող այլ ռեսուրսներով կայուն ապահովումը:
Փեզեշքիանը նշել է, որ նման գործողություններն, իր գնահատմամբ, նպատակ ունեն ձևավորել սոցիալական դժգոհություն և խարխլել պետական կառավարման հանդեպ վստահությունը:
Նա նաև հայտարարել է, որ սպառման կառավարումն ու արդյունավետության բարձրացումը դառնում են տնտեսական անվտանգության և պետության կայունության առանցքային տարրերը:
Առանձնահատուկ կերպով Իրանի նախագահն ընդգծել է երկրի զգալի ռեսուրսային և աշխարհաքաղաքական ներուժը՝ հայտարարելով, որ երկիրն օժտված է «բացառիկ հնարավորություններով և եզակի ռազմավարական դիրքով»:
Նրա խոսքով՝ ոչ մի արտաքին ուժ ի վիճակի չէ սահմանափակել երկրի իրական հնարավորությունները, եթե ինքը՝ երկիրը, ներքին պայմաններ չի ստեղծում նման սահմանափակումների համար:
Փեզեշքիանը հավելել է, որ սահմանափակումների հաղթահարումը պահանջում է մոտեցման փոփոխություն, սեփական հնարավորությունների հանդեպ վստահության ամրապնդում և համազգային բոլոր ռեսուրսների մոբիլիզացում:
Հետևեք մեզ Viber-ում
