Հանգիստ եղեք, դեռ շատ վենսեր կգան ու կգնան այս 4 ամսում

Հրապարակ օրաթերթի գլխավոր խմբագիր Արմինե Օհանյանը գրում է. 

Շատ ունիկալ ժողովուրդ ենք` մի մասս թունդ ոգևորված Վենսի այցից, մյուսներս նույնքան թունդ` հիասթափված ու հուսահատ: Ինձ նույնքան անհասկանալի են երկու կողմի էմոցիաներն էլ ու զարմանում եմ, որ մարդիկ տարրական անալիզ չեն կարողանում անել:
Այն, որ այդ այցը չի կարող Հարավային Կովկասում ԱՄՆ գերտերության հաստատման մասին ազդարարել, մեր անվտանգային եւ այլ հարցերի լուծման բանալին դառնալ, դա հասկանալու համար մեծ ջանքեր պետք չեն` բավական է մեր հայացքն ուղղենք դեպի Վրաստան, հիշենք Աֆղանստանի ոչ հեռավոր անցյալի դեպքերը, վերադառնանք ուկրաինական իրականություն:
Այն, որ ամերիկյան հովանավորությունից զրկվելն էլ մեծ կատաստրոֆա ու կործանում չէ, դրա համար էլ բավական է դեմքով դառնանք դեպի Իրան: Հասկանալու համար, որ ԱՄՆ-ի հետ ընկերությունը հավերժ չէ ու դրա վրա երկարաժամկետ պլաններ կառուցելն առնվազն միամտություն է, դրա համար էլ ընդամենը պետք է հետեւել Եւրոպայում ծավալվող իրադարձություններին, ԱՄՆ-Կանադա հարաբերություններին, Վենեսուելայի նախագահի ճակատագրին, Գրենլանդիայի դեպքերին...
Այն, որ վաղեմի թշնամիները կարող են մեկ օրում բարեկամանալ, իսկ ճակատագրով իրար կապված ժողովուրդներն անվերադարձ թշնամանալ, դա էլ ապացուցվում են Թրամփ-Պուտին շփումների, ռուս-ուկրաինական պատերազմի և այլ օրինակներով:
Իսկ այն, որ Վենսի` Փաշինյանին ուղղված ռեվերանսը կարող է Հայաստանի համար ճակատագրական լինել եւ ոմանք երեկվանից դեպրեսիայի մեջ են ու ընտրություններում ՔՊ-ի հաղթանակն են կանխատեսում (Վենսն ասել է` ես ուզում եմ ինքը մնա), առավել քան զավեշտական է, քանի որ անգամ եթե Թրամփն էլ անձամբ ժամանի ու ընտրության շեմին կոչ անի ՔՊ-ին ձայն տալ եւ բոլոր գերտերությունների ղեկավարները միաբերան պնդեն, որ Փաշինյանը պետք է վերընտրվի, ընտրողը միևնույնն է` լինելու է ՀՀ քաղաքացին եւ նույնիսկ սփյուռքում ապրող մեր հայրենակիցները շատ փոքր հնարավորություն են ունենալու ազդել մեր ընտրությունների արդյունքների վրա:
Որպեսզի համոզվեք, որ հին ընտրական կլիշեները չեն գործում և 26-ին ավանդական ոչ մի սկզբունք ու մեթոդ չի աշխատելու, ձեզ պատմեմ մի մեծ համայնքում անառարկելի հեղինակություն հանդիսացող մեծ գործարարի ասածը` 21-ի ընտրություններից հետո: Անասելի վիրավորված էր իր համայնքից, որի յուրաքանչյուր բնակչին տասնյակ տարիներով օգնել էր` աշխատատեղ, ուսման ու բուժվելու համար մեծ գումարներ, իր հաշվին շինարարություն...ընտրությունների ժամանակ մի մարդու պես հրաժարվել էին իր հորդորով քվեարկելուց: Հիմա բոլորովին այլ չափանիշներ են աշխատում (առաջիկայում կգրեմ իմ կարծիքով` ինչ)...
Ո՞ւմ վրա է ազդելու Վենսի կարծիքը: Մի մարդու, որի այցով հետաքրքրված է մի 100-200 հազար մարդ միայն, որի մասին մի շաբաթից մարդիկ իսպառ մոռանալու են: Մի պաշտոնյայի, որը շատ ավելի ճոխ տեքստեր այսօր Բաքվում է ասել, որի խոստացած մոդուլային կայանների մասին ոչ ոք կոնկրետ պատկերացում չունի...և որի այցի օգուտներն էլ օդում սավառնող ամպեր են:
Հանգիստ եղեք, դեռ շատ վենսեր կգան ու կգնան այս 4 ամսում, հոգեբանական գրոհն ու հիբրիդային պատերազմը, որը իշխող ուժը սանձազերծել է հայ ժողովրդի դեմ, շարունակվում է: Սա նյարդերի պատերազմ է` ում նյարդերն ավելի ամուր եղան, ով իր երկիրն ավելի շատ սիրեց` նա է հաղթելու: