Ազգային ժողովի պատվերով 4 մլն դրամի տիկնիկային ներկայացումներ են կազմակերպվել
Ազգային ժողովը մեկ անձից կատարվող գնման ընթացակարգով Հ. Թումանյանի Անվան Ազգային Տիկնիկային Թատրոն ՊՈԱԿ-ին ամանորյա թատերական միջոցառման կազմակերպման ծառայություններ է պատվիրել։ Պայմանագիրը կնքվել է դեկտեմբերի 26-ին, իսկ պայմանագրի արժեքը 4 մլն դրամ է կազմել։ Ըստ պայմանագրի՝ ներկայացումները կազմակերպվել են ստորագրումից հետո՝ 5 աշխատանքային օրվա ընթացում, իսկ գումարը ամբողջությամբ փոխանցվել է դեկտեմբեր ամսին։
Պայմանագրի համաձայն Տիկնիկային թատրոնը 45 րոպե տևողությամբ 2 ներկայացում է կազմակերպել՝ յուրաքանչյունը 125 երեխայի համար (ընդհանուր 250 երեխայի համար)։ Թատրոնը նաև հյուրասիրություն է կազմակերպել՝ 250 հատ պոպ կորն, 250 հատ բնական հյութ, 250 հատ թխվածք մարդուկներ, 250 հատ թխվածք կեքսեր, 250 հատ խմորեղեն։ Մեկ երեխայի ներկայացման մասնակցությունը արժեցել է 16000 դրամ։ Ի դեպ տիկնիկային ներկայացման տոմսերի արժեքները տատանվում են 1500-3000 դրամի սահմանում, որոշ ներկայացումների դեպքում արժեքը կարող է հասնել 5000 դրամ։
Պայմանագիրը ստորագրել են խորհրդարանի աշխատակազմի ղեկավար-գլխավոր քարտուղար Դավիթ Առաքելյանը և Հովհաննես Թումանյանի անվան ազգային տիկնիկային թատրոն ՊՈԱԿ-ի տնօրեն Արտաշես Բաբայանը, որը հայտնի է ոչ միայն՝ նախկին տնօրեն, այժմ՝ թատրոնի գեղարվեստական ղեկավար Ռուբեն Բաբայանի որդին լինելու հանգամանքով, այլև 2018 թվականից առ այսօր Նիկոլ Փաշինյանին սատարելու պատճառով։
2022 թվականից Արտաշես Բաբայանը զբաղեցնում է ՊՈԱԿ-ի տնօրենի պաշտոնը։ Նրա նշանակումը, ըստ պետգնումների armeps համակարգի, նաև «բարեբեր» է եղել թատրոնի համար․ իրար հետևից դրամաշնորհներ ու մեկ անձից կատարվող գնման ընթացակարգով բազմաթիվ պայմանագրեր են կնքվել թատրոնի հետ։
«Հրապարակ օրաթերթ»
Հետևեք մեզ Viber-ում
