Սոցիալական փաթեթի ծրագրում կատարվել են փոփոխություններ

Հանրապետությունում հունվարի 1-ից սկսել է գործել առողջության ապահովագրությունը, որից բխող մի շարք փոփոխություններ են կատարվել սոցիալական փաթեթի ծրագրում։ «Արմենպրես»-ի մամուլի սրահում հրավիրված ասուլիսում ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը նշեց, որ սոցփաթեթի ծրագիրը շարունակելու է գործել և շահառուները իրենց համար նախատեսված 72 հազար դրամը կարող են օգտագործել, պարզապես որոշ փոփոխություններ են եղել։

«Այստեղ մի կարևոր փոփոխություն է տեղի ունեցել։ Եթե նախկինում սոցփաթեթի շահառուն այդ 72 հազար դրամ գումարը ծախսելու համար պարտադիր պետք է բուժզննում, կանխարգելիչ հետազոտություն անցներ և այդ թուղթը ներկայացներ բանկ, ապա հիմա դա պարտադիր չէ»,-ասաց Ժորա Սարգսյանը։

Այդ գումարի կանխիկացման համար ևս պարտադիր չէ կանխարգելիչ բուժզննում անցնել։ Այստեղ Ժորա Սարգսյանն ընդգծեց, որ ոչ բոլորը կարող են կանխիկացնել գումարը։ Դրանից բացի, կանխիկացման գումարի չափը տարբեր մարդկանց համար տարբեր կարող է լինել։

«Կանխիկացնել կարող են նրանք, որոնք կուտակային կենսաթոշակի համակարգի մասնակից են։ Ինչ վերաբերում է կանխիկացվող գումարի չափին, ապա դա հնարավոր է անել այն չափով, որքանով քաղաքացին, օրինակ, 2025 թվականին կուտակային կենսաթոշակային հիմնադրամին փոխանցում է կատարել։ Եթե այնպես ստացվի, որ այդ գումարը քաղաքացին չկարողանա իր ուզած չափով կանխիկացնել, ապա մնացածը կարող է ծախսել մյուս ուղղություններով»,-ասաց Ժորա Սարգսյանը։

Այդ նշված 72 հազար դրամը սոցփաթեթի շահառուն կարող է օգտագործել մի քանի ուղղություններով՝ հանգստի ապահովում, ուսման վճար, հիփոթեքային վարկի մարում, սպորտային կենտրոններից, ինչպես նաև ատամնաբուժական ծառայություններից օգտվում։ Այս ամենին գումարվել է ևս մեկ ուղղություն, որը ներկայացրեց ՀՀ առողջապահության նախարարության պայմանագրերի կատարման նկատմամբ հսկողության խորհրդատու Տիգրան Հովհաննիսյանը։

«Այժմ սոցփաթեթի շահառուները հնարավորություն ունեն այդ 72 հազար դրամը, որն ամսական 6 հազար դրամ է, ուղղել առողջության ապահովագրությանը։ Սոցփաթեթի շահառուն այդ մասին մեկ անգամ դիմում է գրում գործատուին և արդեն 6 հազար դրամն ուղղվում է առողջության ապահովագրությանը։ Ստացվում է առողջության ապահովագրության գումարի մի մասը վճարվում է Զինվորների հիմնադրամին փոխանցվող գումարից, մյուս մասը կամավորության սկզբունքով կարող է լինել սոցփաթեթի գումարից։ Վերջնարդյունքում քաղաքացին իր աշխատավարձից կվճարի 300 դրամ։ Ամեն դեպքում եթե քաղաքացին չի ուղղում սոցփաթեթի այդ 6000 հազար դրամն առողջության ապահովագրությանը, ապա դա կպահվի աշխատավարձից»,-ասաց Տիգրան Հովհաննիսյանը։

Այն քաղաքացիները, որոնք սոցփաթեթի շահառու են ու ստանում են 200 հազար դրամից քիչ աշխատավարձ, ապա նրանք կշարունակեն առողջապահական ծառայություններից օգտվել այնպես, ինչպես նախկինում սոցփաթեթի շրջանակում արել են։

Սոցփաթեթի շահառուների թիվը շուրջ 130 հազար է։