Ահասարսուռ դեպք․ գործի գնալուց սև ավտո է նստել ու կապը կորել է. Մանրամասներ՝ Արմավիրում 42-ամյա կնոջ սպանությունից

Արմավիրի մարզի Խորոնք գյուղում ուշքի չեն գալիս երեկ տեղի ունեցած ահասարսուռ դեպքից, դեկտեմբերի 1–ից որպես անհետ կորած որոնվող համագյուղացի 42 ամյա Արմինե Մկրտումյանին նախօրեին իրավապահները սպանված հայտնաբերել են գյուղի դաշտամիջյան ճանապարհով անցնող ջրատարում։

Բնակիչների պատմելով մարմնին դանակի բազմաթիվ հարվածներ են եղել։

42 ամյա Արմինե Մկրտումյանի չորս հոգանոց ընտանիքն ընդամենը երկու շաբաթ առաջ էր տեղափոխվել Խորոնք գյուղ, հարևաններն ասում են միայն դրականը կարող են պատմել նրանց մասին, որևէ արտառոց բան չեն նկատել։

Բնակիչներից տիկին Թամարան պատմում է. «Երեկ այս ժամերին էր, մի քիչ էլ ուշ, իմացանք, որ սպանված են գտել։ 15 օր է՝ եկել են այստեղ, երկու անգամ բարև եմ տվել, ուրիշ ոչ մի բան։ Խելոք, շատ խելոք, սուսուփուս, չխառնվող, ամուսինը ընտիր մարդ է, ընտիր, աշխատող, ստեղծող մարդիկ են։ Ճիշտ է, 15 օր է, որ եկել են, բայց մոտ չորս-հինգ ամիս է, իրենք գալիս էին, մաքրում էին, հավաքում էին։ Իրար նվիրված ամուսիններ էին, չգիտեմ՝ ինչ կատարվեց, ով այդ ոճրագործությունը կատարեց իրենց հանդեպ»։

Տիկին Թամարան պատմում է, Արմինեն անհամբեր օրերն էր հաշվում, թե երբ է որդու ծառայությունն ավարտվելու, սակայն այդպես էլ որդուն չհասցրեց հանդիպել. «Տղեն զինվոր է, այս հունվարին պիտի գար։ Ասում էր՝ վեց ամիս չեմ տեսել իմ տղային, կարոտից մեռնում եմ»։

Դեկտեմբերի մեկի վաղ առավոտյան շտապել էր աշխատանքի, փողոցի տեսախցիկները ֆիքսել են, թե ինչպես է նստում սև ավտոմեքենան, դրանից հետո նրա հետ կապը կորել է։ «Գործի գնալուց է եղել, ինչ-որ սև ավտո է եկել, աինքը ինչ-որ նայել է, չի նստել, հետո նստել, գնացել է։ Հետո գործի տեղից զանգել են, ասել են՝ բա մաման ինչի՞ չի գալիս գործի, ասել է՝ մաման շուտ է եկել։ Ժամը 7:15-ին դուրս է եկել տնից ու հեռախոսը անջատված է եղել, կապ չի եղել»։

Երեք օր ոստիկաններն ապարդյուն որոնելուց հետո, ի վերջո գտել են նրա մարմինը։

Գյուղացիներին անհանգստացնում է վերջին շրջանում հաճախակի դարձած սպանությունները։

«Մի քիչ այդ մասին էլ պիտի մեր կառավարությունը մտածի, հետաքրքրվի, իմանա, դեմն առնեն, մեր ղեկավարները պիտի մտածեն, մենք փոքր մարդիկ ենք, ոչ մի բան չենք կարող ասել, առաջ մենք դռները բաց էինք թողնում, նոր քնում, բայց հիմա օրը ցերեկով էլ դուռը փակում ենք, վախենում ենք արդեն, երկու շուն ենք պահում»,–ասում է տիկին Թամարան։

Հիշեցնենք, որ դեկտեմբերի 3-ին Վաղարշապատի համայնքային ոստիկանները Գրիբոյեդով բնակավայրի դաշտամիջյան հատվածում հայտնաբերել են դի։ Իրավապահները պարզել են, որ մահացածը 1983 թվականի ծնված Արմինե Մկրտումյանն է։ Նրա անհետ կորելու մասին հաղորդվել էր դեկտեմբերի 1-ին։

Դեկտեմբերի 4-ին Մեծամոր քաղաքում հայտնաբերվել, սպանություն կատարելու կասկածանքով ձերբակալվել և Վաղարշապատի բաժին է տեղափոխվել Արմավիր գյուղի 35-ամյա բնակիչը, որը խոստովանել է, որ ինքն է սպանել է 42-ամյա կնոջը։ Նա և կազմված փաստաթղթերը ներկայացվել են նախաքննական մարմին․ նախաքննությունը շարունակվում է։

Ավելի ուշ հայտնի դարձավ, որ 42-ամյա Արմինե Մկրտումյանին սպանելուց հետո ենթադրյալ մարդասպանը նրա վզնոցը և ականջօղերը գողացել և տարել է գրավադրել։ Մեզ հասած տեղեկությամբ՝ քրեական ոստիկանների աշխատանքի արդյունքում հայտնաբերվել են նաև զարդերը։