Մարզիչ Աբրահամ Խաշմանյանը պարզաբանել է իր շուրջ ստեղծված իրավիճակը

Աբրահամ Խաշմանյանի շուրջ խոսակցությունները, նյութերը վերջին օրերին հայկական ֆուտբոլում ամենաքննարկվածն էին: Մոսկվայից ժամեր առաջ վերադարձած Խաշմանյանի հետ armsport.am-ը զրուցել է՝ իմանալով իրականությունը: Խոսելով այս ընթացքում իրադարձությունների զարգացման մասին՝ Աբրահամ Խաշմանյանն ասաց. «Ընդամենը մեկ ժամ առաջ եմ վերադարձել Հայաստան: Ինձ համար զավեշտալի է այն, որ հենց երկրից բացակայում եմ, սկսում են բազում խոսակցությունները իմ անվան շուրջ: Պաշտոնապես հայտնում եմ, որ բոլոր խոսակցությունները չեն համապատասխանում իրականությանը: Ինձ համար զարմանալի էր մասնավորապես մեր ակումբի արձագանքը. ես միշտ ակումբի նախագահի առջև ազնիվ եմ եղել, իմ ամեն քայլը Բագրատ Նավոյանն իմացել է: Դեկտեմբերի 7-ին մեկնել եմ Մոսկվա անձնական հարցերով: Կարող էի և չտեղեկացնել ակումբի ղեկավարին, քանի որ իմ անձնական հարցով արձակուրդի մեջ եմ. բայց մեր հարաբերությունները այն մակարդակի են, որ միշտ մեկնելուց առաջ զանգահարել եմ նախագահին ու ասել, թե ուր եմ մեկնում և ինչի համար: Նա ամեն ինչ գիտեր: Արդեն 3-րդ տարին է, որ Կարագանդայի «Շախտյորը» հետաքրքրված է իմ ծառայություններով: Ես կամ իրենց շորթ լիստում, որտեղ կան նաև այլ մարզիչներ: Ես այդտեղ ոչ մի արտառոց բան չեմ տեսնում, դա իրենց իրավունքն է, ոչ մեկ չի կարող ասել, թե ինչու եք նման բան անում: Այժմ հայկական ցանկացած ակումբի համար մեծ պատիվ է, որ արտասահմանյան ակումբներ հետաքրքրված են իրենց մարզչով: Կարծում եմ, որ դա հայկական ֆուտբոլի համար իրադարձություն է: Մեծ պատիվ է նաև ինձ համար: Ֆուտբոլիստով ինչ-որ տեղ կարող են հետաքրքրվել, բայց մարզչի դեպքում ամեն ինչ այլ է: Դա պատիվ է մարզչի, ակումբի ու հայկական ֆուտբբոլի համար: 2 տարի առաջ ինքս մեկնել եմ Կարագանդա, հարցը գրեթե 99 տոկոսով լուծված էր, 1 տոկոսը խանգարեց: Դրանից հետո ամեն ինչ հետաքրքրության մակարդակում է: Չէի կարծում, որ այսաստիճան անդրադարձ կլինի թեմային: «Ալաշկերտի» կայքում հայտարարությունից հետո զրուցել եմ Նավոյանի հետ, կարողացել ենք հասկանալ իրար, նա ասաց, որ վերադառնալուց հետո կհանդիպենք և կքննարկենք բոլոր հարցերը: Իմ և մարզչական շտաբի պայմանագրերը վերջացել են «Ալաշկերտի» հետ և ես չեմ կարծում, որ դա բացի «Ալաշկերտ» ակումբից, Աբրահամ Խաշմանյանից և մարզչական շտաբից բացի որևէ մեկն իրավունք ունի «մտնել» այդտեղ: Դա մեր քննարկելու հարցն է. ուրիշ ոչ մեկի: Վաղը հանդիպելու եմ Բագրատ Նավոյանի հետ և քննարկելու ենք բոլոր հարցերը, եթե համաձայնության գանք և որոշենք նոր պայմանագիր կնքել հետագա աշխատանքի համար, ապա կանցնենք մեր աշխատանքին և կշարունակենք զբաղվել մեր գործով: Եթե որոշենք չերկարաձգել պայմանագիրը, շատ ջերմորեն հաջողություն կմաղթենք միմյանց, որը ես համարում եմ նորմալ: Իմ գործունեությունը և ծառայությունը այնքան ծանրակշիռ են ակումբի համար, որ կարծում եմ անգամ բաժանվելիս պետք է ջերմ լինենք: Այդ մասին Խոսում են մեր աշխատանքները և փաստերը»: