Վաշինգտոնը միացավ Հայաստանին և Արցախին

Միացյալ Նահանգները Լեռնային Ղարաբաղի հակամարտության կարգավորման հարցում աջակցում է ԵԱՀԿ Մինսկի խմբի գործադրած ջանքերին, երեկ Վիեննայում ԵԱՀԿ արտաքին գործերի նախարարների խորհրդի նիստի բացման արարողությանը հայտարարել է Միացյալ Նահանգների պետքարտուղար Ռեքս Թիլերսոնը: «Մենք աջակցում ենք ԼՂ խնդրի լուծում գտնելուն ուղղված Մինսկի խմբի ջանքերին: Մեզ գոհացնում են այն հանձնառությունները, որոնք հոկտեմբերին տեղի ունեցած հանդիպման ժամանակ հաստատեցին Հայաստանի և Ադրբեջանի նախագահները, մասնավորապես՝ աշխուժացնել բանակցային գործընթացը, նվազեցնել լարվածությունը շփման գծում: Կարևոր առաջընթաց կարող է արձանագրվել միայն այն դեպքում, երբ կա քաղաքական կամք: Մենք ողջունում ենք երեկ կողմերի կայացրած որոշումը՝ խոսելու խնդրի մասին»,- ասել է Թիլերսոնը: Նա ընդգծել է ձգձգված հակամարտություններում առաջընթաց գրանցելու կարևորությունը՝ ինչպես Լեռնային Ղարաբաղում, այնպես էլ Վրաստանում և Մոլդովայում: Վերջին շրջանում ղարաբաղյան կարգավորման ուղղությամբ ԵԱՀԿ Մինսկի խմբի համանախագահների ջանքերը՝ ամեն գնով ապահովել բանակցությունները, ինչ-որ չափով, կարելի է ասել, հաջողեցին: Միջնորդների նպատակը մեկն է՝ ոչ մի կերպ թույլ չտալ, որպեսզի շփման գծում լարվածությունը աճի: Կողմերին բանակցությունների սեղանի շուրջ նստեցնելը համանախագահող երկրների թիվ մեկ խնդիրն է այսօր և նրանք ակնհայտ է, որ իսկապես, ջանք չեն խնայում այդ ուղղությամբ: Ավելին՝ սրան զուգահեռ, բացահայտ նկատվում է, որ միջազգային հանրությունն էլ իր հերթին ուժեղ աջակցություն է ցույց տալիս ԵԱՀԿ Մինսկի խմբին, կարծես, արգելափակելով Բաքվի ջանքերը՝ ԵԱՀԿ Մինսկի խմբի ձևաչափը կործանելու ուղղությամբ: Այս պայմաններում՝ Բաքվին այլ բան չի մնում, քան հաշտվել իրավիճակի հետ ու գնալ բանակցությունների: Երեկ, փաստացի, նաև Վաշինգտոնը, որպես ԵԱՀԿ Մինսկի խմբի համանախագահող պետություն, միացավ Բաքվի ապակառուցողական կեցվածքի դեմ արշավին՝ շեշտելով ԵԱՀԿ Մինսկի խմբի դերն և խաղաղ բանակցությունների կարևորությունը: Իհարկե, սրանք հայտարարություններ են, երաշխիք չեն, որ Ալիևը չի դիմի նորանոր սադրանքների, բայցև փաստ է, որ միջազգային հանրությունը լուրջ ճնշում է գործադրում, փորձելով, կանխել հնարավոր արկածախնդրությունները: Այս առումով, Միացյալ Նահանգների պետքարտուղար Ռեքս Թիլերսոնի երեկվա հայտարարությունը Հայաստանին և Արցախին միանալու ու աջակցություն հայտնելու ուղիղ մեսիջ է: Հավելենք, որ երեկ նաև ՌԴ ԱԳ նախարարն է Վիեննայում անդրադարձել ԼՂ խնդրին: Ռուսաստանը կշարունակի ջանքերը ԼՂ հակամարտությանը լուծում գտնելու ուղղությամբ, ասել է Սերգեյ Լավրովը. «Որպես ԵԱՀԿ Մինսկի խմբի համանախագահ՝ Ռուսաստանը կշարունակի ջանքերը՝ ԼՂ հակամարտության կարգավորման համար բոլոր կողմերին ընդունելի լուծում փնտրելու ուղղությամբ»: Ավելի ուշ հրապարակվեց կարևոր համատեղ հայտարարություն՝ այս անգամ ԱՄՆ-ի, Ռուսաստանի և Ֆրանսիայի բարձրաստիճան պաշտոնյաների մակարդակով: ԵԱՀԿ Մինսկի խմբի համանախագահ երկրների՝ ԵԱՀԿ նախարարների խորհրդի պատվիրակությունները՝ Ռուսաստանի արտգործնախարար Սերգեյ Լավրովը, ԱՄՆ պետքարտուղար Ռեքս Թիլերսոնը և Ֆրանսիայի մշտական ներկայացուցիչ Վերոնիկ Ռոժե Լականը համատեղ հայտարարություն են տարածել՝ կապված դեկտեմբերի 6-ին Վիեննայում Հայաստանի և Ադրբեջանի արտգործնախարարների հանդիպման հետ: Հայտարարության մեջ նշվում է, որ համանախագահները հավատարիմ են իրենց հանձնառություններին՝միջնորդ հանդիսանալ ԼՂ-ի հակամարտության խաղաղ կարգավորման գործում՝ հիմնված Հելսինկյան եզրափակիչ ակտի հիմնարար սկզբունքների վրա, այդ թվում ուժի կամ ուժի սպառնալիքի չկիրառում, տարածքային ամբողջականություն, մարդկանց հավասար իրավունքները և ինքնորոշում: «Մենք վերահաստատում ենք մեր միացյալ հանձնառությունները՝ բանակցել հակամարտության խաղաղ լուծման շուրջ՝ որպես տարածաշրջանի մարդկանց համար իրական լուծում բերելու միակ ուղի: Մենք ողջունում ենք բարձր մակարդակի երկխոսության վերականգնումը հոկտեմբերի 16-ին Ժնևում Հայաստանի և Ադրբեջանի նախագահների միջև, ինչպես նաև Վիեննայում դեկտեմբերի 6-ի հանդիպումը արտգործնախարարների միջև՝ Մինսկի խմբի համանախագահների հովանու ներքո: Մենք գոհունակություն ենք հայտնում ակտիվացած բանակցություններից և դիմում ենք կողմերին՝ կոչ անելով կենտրոնացնել իրենց ջանքերը՝ փոխզիջումային լուծում գտնելու քաղաքական կարգավորման հիմնական հարցերի շուրջ: Հետագա հապաղումները միայն ավելի կբարդացնեն իրավիճակը և կարող են հարցականի տակ դնել կողմերի հանձնառությունները հարատև խաղաղություն հաստատելու վերաբերյալ: Անդրադառնալով երկու երկրների նախագահների պարտավորություններին՝ լրացուցիչ միջոցներ ձեռնարկել շփման գծում լարվածությունը թուլացնելու ուղղությամբ՝ մենք կոչ ենք անում Բաքվին և Երևանին ընդլայնել ԵԱՀԿ գործող նախագահի անձնական ներկայացուցչի գրասենյակը: Պետք է կյանքի կոչվեն նաև 2016թ. Վիեննայի և Սանկտ Պետերբուրգի գագաթնաժողովներում ընդունված մյուս որոշումները: Մենք ողջունում ենք, որ կողմերը պատրաստակամություն են հայտնել հաշվի առնել համանախագահների առաջարկը՝ ուղղված հայերի և ադրբեջանցիների միջև մարդկային շփումների վերականգնմանը և աջակցությանը Կարմիր խաչի միջազգային կոմիտեին՝ անհետ կորածների տվյալների փոխանական վերաբերյալ: Մենք կողմերին կոչ ենք անում ավելորդ կերպով չքաղաքականացնել այս կարևոր մարդասիրական քայլերը: Մեր երկրները շարունակում են պատրաստակամ մնալ աշխատելու կողմերի հետ՝ հանուն հարատև և խաղաղ կարգավորման: Մենք հրահանգել ենք մեր համանախագահներին շարունակել միջնորդական գործունեությունը՝ կողմերին ներկայացված առաջարկությունների վերաբերյալ փոխզիջումների առաջխաղացման ուղղությամբ, բայց շեշտում ենք, որ ԼՂ-ի հակամարտության հիմնական պատասխանատվությունը մնում է Հայաստանի և Ադրբեջանի նախագահների ուսերին»,- ասվում է հայտարարությունում: Թամար Բագրատունի