Գեղամ Ստեփանյան. «Հանրահավաքը կոչված է բարձրաձայնելու այն խնդիրները, որոնք ՀՀ կառավարությունը շարունակում է անտեսել»
Արցախի Հանրապետության մարդու իրավունքների պաշտպան Գեղամ Ստեփանյանը, այսօր՝ արցախցիների իրավունքները բարձրաձայնող հանրահավաքի մեկնարկից առաջ, հայտարարեց, որ հավաքը նախորդի տրամաբանական շարունակությունն է։ Նրա խոսքով՝ թեև նախորդ հանրահավաքի ժամանակ բարձրացված սոցիալական որոշ խնդիրներին անդրադարձ է եղել, արված փոփոխությունները չեն լուծում արցախցիների արժանապատիվ կյանք ունենալու հիմնախնդիրը։
«Իրական բարելավման համար անհրաժեշտ են խորքային և համակարգային լուծումներ։ Դա է պատճառը, որ այս հանրահավաքը կազմակերպվեց՝ ևս մեկ անգամ ցույց տալու արցախցիների խնդիրներն ու դիրքորոշումը», — ընդգծեց Ստեփանյանը։
Նա նշել է, որ այս պահին ՀՀ կառավարության հետ որևէ բանակցություն չի ընթանում։ Ըստ Ստեփանյանի՝ իշխանությունները անտեսում են մարտի 29-ին ներկայացված 12 կետանոց պահանջագրում ներառված առանցքային հարցերը։ Դրանցից ամենացավալին՝ քաղաքացիության խնդիրը, շարունակում է մնալ չլուծված։
«Շատ արցախցիներ, հոգեբանական և ինքնության առումով, չեն կարողանում հրաժարվել իրենց արցախյան անձնագրերից։ Թեպետ ես բացատրել եմ, որ գույքային իրավունքների իրացումը քաղաքացիությունից կախված չէ, դա դեռևս բավարար չէ մարդկանց մտահոգությունները փարատելու համար», — նշեց ՄԻՊ-ը։
Ստեփանյանը խոսեց նաև բնակարանային ապահովման խնդիրների մասին՝ շեշտելով, որ հատկապես փոքր ընտանիքների հարցը մնում է անտեսված։
Հետևեք մեզ Viber-ում
