Սերժ Սարգսյանի մեսիջը Արցախից՝ Անկարային ու Բաքվին

Հայաստանի և Ադրբեջանի արտաքին գործերի նախարարները, հավանաբար, կհանդիպեն դեկտեմբերի 6-ին Վիեննայում, որտեղ անցկացվելու է ԵԱՀԿ արտգործնախարարների խորհրդի նիստը: Էդվարդ Նալբանդյանի հետ առաջիկա հանդիպման մասին հայտնել է Ադրբեջանի արտգործնախարար Էլմար Մամեդյարովը՝ Թուրքիայի և Պակիստանի արտգործնախարարների հետ Բաքվում կայացած համատեղ ասուլիսում: Մամեդյարովն ասել է, որ Վիեննայում հանդիպելու է ԵԱՀԿ Մինսկի խմբի համանախագահների և Հայաստանի արտգործնախարարի հետ: Նա հայտնել է, որ հանդիպման համար Ադրբեջանը տվել է իր համաձայնությունը: «Մենք միշտ ասել ենք, որ բանակցությունները պետք է լինեն տրամաբանական և բովանդակալից: Մոսկվայում համանախագահների հետ հանդիպմանը մենք խորը և հանգամանալից քննարկում ենք ունեցել: Համանախագահները, հավանաբար, բանակցությունները կշարունակեն այդ ուղղությամբ», - ասել է նա: Ի դեպ, ուշագրավ հանդիպում է կայացել օրերս: Թուրքիայի արտգործնախարար Մևլութ Չավուշօղլուն էլ Անկարայում հանդիպել է ԵԱՀԿ Մինսկի խմբի համանախագահներին: «Ես նրանց ասել եմ, որ անհրաժեշտ է ավելի ակտիվ, վճռական և անկեղծ լինել, և ընդգծել եմ, որ այդ հարցում աջակցություն կցուցաբերեմ», նշել է Չավուշօղլուն՝ հիշեցնելով նաև Թուրքիայի և Ռուսաստանի նախագահներ Ռեջեփ Էրդողանի և Վլադիմիր Պուտինի հանդիպումը: Նրա փոխանցմամբ՝ այդ հանդիպմանը Էրդողանն ասել էր, որ եթե Ռուսաստանը վճռական լինի, ապա Ղարաբաղի խնդիրը կլուծվի, և Թուրքիան պաշտպանում է այդ նախաձեռնությունը: Ի դեպ, նկատենք, որ Ադրբեջանի, Թուրքիայի և Պակիստանի ԱԳ նախարարների եռակողմ հանդիպում առաջին անգամ է անցկացվում: Հանդիպման արդյունքում ընդունված փաստաթղթում նրանք վճռական աջակցություն են հայտնել պետությունների անկախությանը, ինքնիշխանությանը, տարածքային ամբողջականությանը և միջազգայնորեն ճանաչված սահմանների անձեռնմխելիությանը: Այստեղ, իհարկե, նախ, խիստ ուշագրավ է, որ Թուրքիայի արտգործնախարար Մևլութ Չավուշօղլուն Անկարայում հանդիպել է ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպշիկի հետ: Չավուշօղլուն տեղեկացրել էր Twitter իր միկրոբլոգում` հրապարակելով նաև լուսանկար ու գրելով. «Հանդիպեցի Անկարայում համանախագահների հետ և ևս մեկ անգամ հայտնեցի Թուրքիայի աջակցությունը Մինսկի խմբի գործունեությանը»: Հիշեցնենք, որ Թուրքիան Հայաստանի, Ադրբեջանի, Ամերիկայի Միացյալ Նահանգների, Ֆրանսիայի, Ռուսաստանի, Բելառուսի, Գերմանիայի, Իտալիայի, Շվեդիայի, Ֆինլանդիայի հետ մտնում է ԵԱՀՄ Մինսկի խմբի կազմի մեջ: Բաքուն ու Անկարան մեկ անգամ չեն դժգոհել ԵԱՀԿ Մինսկի խմբի գործունեությունից: Ուստի հետաքրքրական է, որ Անկարան իր աջակցությունն է հայտնել ԵԱՀԿ Մինսկի խմբի գործունեությանը, մի բան, որը բացարձակապես դուրս չի գալիս Բաքվին: Իհարկե, համանախագահներին Անկարային ընդունելով՝ Թուրքիայի իշխանությունները ցույց են տալիս, թե որքան կարևոր են համարում ԼՂ խնդրի լուծումը ու որքան են մտածում Բաքվի «տառապանքների» մասին: Թուրքիան ջանքեր է գործադրում Լեռնային Ղարաբաղի հակամարտության լուծման համար, այդ հարցի շուրջ Թուրքիայի և Ադրբեջանի նախագահները մշտական կապի մեջ են, ասել է Մևլութ Չավուշօղլուն՝ հիշեցնելով, որ Ռուսաստանի նախագահ Վլադիմիր Պուտինի հետ հանդիպումից հետո Թուրքիայի առաջնորդ Էրդողանի խոսքերը: «Մենք պաշտպանում ենք բոլոր բանաձևերը, որոնք համապատասխանում են Ադրբեջանի շահերին: Երեկ ես հանդիպել եմ համանախագահների հետ: Ես նրանց ասել եմ, որ անհրաժեշտ է լինել առավել ակտիվ, վճռական և անկեղծ, և ընդգծել եմ, որ աջակցություն կցուցաբերեմ ցանկացած ոլորտում»,- ասել է Չավուշօղլուն: Բոլորովին էլ պատահական չէ, որ Անկարայի «ջանքերի» ֆոնին՝ նաև Ալիևն է բարձրաձայնել: Լեռնային Ղարաբաղի հարցում ստատուս քվոն պետք է փոխվի, և հակամարտությունը պետք է կարգավորվի ՄԱԿ-ի Անվտանգության խորհրդի բանաձևերի շրջանակներում, ասել է Ալիևը՝ ելույթ ունենալով Բաքվում ընթացող «Ասիայի սիրտը - Ստամբուլյան գործընթաց» համաժողովին: «Ադրբեջանի տարածքի մեկ հինգերորդը օկուպացված է: Մեր բնակավայրերը, մզկիթները ավերված են: Ստատուս քվոն պետք է փոխվի, ինչը բազմիցս ընդգծել են [ԵԱՀԿ Մինսկի խմբի] համանախագահները: Ղարաբաղյան հակամարտությունը պետք է կարգավորվի ՄԱԿ-ի Անվտանգության խորհրդի բանաձևերի շրջանակներում», - ասել է Ադրբեջանի նախագահը: ԼՂ հակամարտության հարցը երեկ Բաքվում քննարկել են նաև Ադրբեջանի և Թուրքիայի ԱԳ նախարարները: «Ասիայի սիրտը - Ստամբուլյան գործընթաց» համաժողովին մասնակցելու նպատակով Ադրբեջանի մայրաքաղաք ժամանած թուրքական դիվանագիտական գերատեսչության ղեկավար Մևլութ Չավուշօղլուն նշել է, թե Թուրքիան քայլեր է ձեռնարկում ղարաբաղյան խնդրի կարգավորման և «Ադրբեջանի օկուպացված տարածքներն ազատագրելու» համար: Այս ֆոնին, Սերժ Սարգսյան օրերս աշխատանքային այցով ժամանեց Արցախ, որտեղ Արցախի Նախագահ Բակո Սահակյանի հետ այցելել է Պաշտպանության բանակի շտաբ, որտեղ տեղի է ունեցել ավանդաբար անցկացվող տարեվերջյան խորհրդակցություն՝ ՀՀ և ԱՀ պաշտպանության նախարարների և բարձրաստիճան հրամկազմի ներկայացուցիչների մասնակցությամբ, քննարկվել են բանակաշինությանը վերաբերող հարցեր: Դեկտեմբերի 2-ին Սերժ Սարգսյանը Բակո Սահակյանի, ՀՀ և ԱՀ պաշտպանության նախարարների և զինված ուժերի բարձրաստիճան հրամկազմի ներկայացուցիչների հետ դիտել է Արցախի Հանրապետության հարավարևելյան հատվածում պաշտպանության բանակի համահավաք զորախմբի կողմից անցկացրած զորավարժությունները: Անկարայի ու Բաքվի ակտիվության ֆոնին, թերևս, Սերժ Սարգսյանն էլ ցույց է տալիս, որ Հայաստանը կանգնած է Արցախի թիկունքին, և հնարավոր ճնշումներն ու սադրանքները արդյունք չեն տալու: Թամար Բագրատունի