Սաղ լավ ա
Նոր Սահմանադրություն իր հետ գոնե մի գդալ ուրախություն է բերել, այդ ուրախությունը խորհրդարանի պատերի ներսում է, պատգամավորի տեսքով, որը նոր Սահմանադրության պահանջով է հայտնվել խորհրդարանում։ Բա չեք ասի մենք այնքան լիբերալ ժողովուրդ ու պետություն ենք, որ մեր օրենսդիր մարմնում ներկայացուցիչներ պետք է ունենան նաեւ երկրում բնակվող ազգային փոքրամասնությունները, որպեսզի բարձրաձայնեն իրենց դարդն ու ցավը, իրենց խնդիրները, պահանջ ներկայացնեն տվյալ պահի իշխանություններին, ֆլան, ֆստան։ ԱԺ գործունեության կարճ ընթացքը ցույց տալիս, որ ազգային փոքրամասնությունների ներկայացուցիչները հիմնականում արտահայտում են այն կուսակցության կամ դաշինքի դիրքորոշումը, որով հայտնվել են ԱԺ-ում, օրինակ մեր քուրդ բարեկամ Կնյազ Հասանովը, որը պատիվ ունեցավ մի քանի ժամով ԱԺ նախագահ աշխատել, ավելին է, քան ցանկացած մոլի Հանրապետական։ Նա «Հայկական ժամանակ»-ին հարցազրույց է տվել ու քեֆ-ուրախություն ստեղծել իր շուրջ, իր հայտնած մտքերի շուրջ։ Յոթանասունն անց Հասանովի համար այս կյանքում ամեն ինչ լավ ա, ավելին, քան ՀՀԿ-ում։ Ասենք «Զինվորական ծառայության եւ զինծառայողի կարգավիճակի մասին» աղմկահարույց, ըմբոստություն առաջացած օրենքը մեր քուրդ բարեկամի համար «շատ լավ օրենք է» ․«Շատ նորմալ, շատ լավ օրենք է, լավ էլ քննարկվեց՝ բոլորն էլ ընդունեցին: Շատ նորմալ օրենք է:» Ակադեմիական տարկետումից զրկումն էլ է լավ, որովհետեւ նոր օրենքն ավելի լավն է․«Այս դեպքում մի լավ օրենք կա, որ, եթե ուզում ես ընդունվելուց հետո կիսատ չթողնես քո ուսումը, ապա պայման ես կապում եւ սովորելուց հետո գնում ծառայում ես՝ երեք տարի: Այդ ժամանակ նրանց աշխատավարձ է տրվում, արտոնություններ են ստանում՝ մեկ շաբաթ տուն են գալիս, երկու շաբաթ էլ գնում են ծառայելու: Մեր համայնքում բոլորս էլ լավ կարծիքի ենք այս օրենքի վերաբերյալ»: «Ընտանեկան բռնության կանխարգելման» օրենքն էլ է լավը, բայց մեր քուրդ բարեկամների մենթալիտետը թուլ չի տա, որ «ամեն վայրկյան վազեն միլիցա կամ դատարան», լավ է, որ ՀՀԿ-ն նման օրենք է ընդունում, բայց քրդական ընտանիքում բռնությունը ադաթ է․« Մեր ադաթներում հայրական ապտակ էլ կա: Ապտակ կա, որ երեխայի կողմից չի ընդունվում: Դեպքեր գիտեմ, որ մարդը պլանքաշ եկել է, ընտանիքին ծեծում է, կռվում, երեխաներին է ծեծում, երեխան էլ իր հերթին է ափերից դուրս գալիս եւ այլն: Սա լավ օրենք է, բայց մենք չենք ընդունում, որ ամեն անգամ միլիցայի աշխատողը գա ընտանիք: Հետո կասեն՝ դու ինձ տվեցիր միլիցայի ձեռը ու էլի պատմություններ կսկսվեն»։ Ծեծուջարդից բացի մեր քուրդ բարեկամը խոսել է նաեւ քաղաքական մեծ-մեծ խնդիրներից, պատմական մտքեր հայտնել այն մասին, որ Հայաստան-ԵՄ համապարփակ եւ ընդլայնված համաձայնագիրը « Դա շատ հաջողված երեւույթ է», ասում է նա, իսկ մինչ դու ուզում ես մտածել՝ ուխ , ՀՀԿ-ում հակառուսական դեմքեր էլ կան, մեկ էլ կարդում ես շարունակությունը․«Ռուսականն էլ է լավը: Ոչ բոլոր երկրներին է հնարավորություն տրվել օգտվել եվրոպական եւ ռուսական այդ կառուցվածքներից: Ես ում հետ խոսում եմ բոլորն էլ լավ են ընդունում: Սա հաջողված համաձայնագիր է»: Տո մեր բարեկամի համար ընդդիմադիրներն էլ են լավը, ոչինչ որ, ԵԱՏՄ-ից դուրս գալու նախագիծ են բերում, բայց այնտեղ էլ շատ խելացի տղաներ կան»։ Դե իսկ քուրդ ազգընտիրի մտքի կուլմինացիան այն է, որ ամենալավը ՀՀԿ-ն է ու ինչ ասում է, ինչ անում է, ուրեմն ամենալավն է։ ․«Այսօր ժողովուրդը 50 տոկոսից ավելի ձայն է տվել իշխող ՀՀԿ-ին, եւ նրանք էլ կորոշեն, թե ով է լինելու վարչապետ: Մենք էլ այդ ժամանակ մեր խոսքը կասենք»,- ասում է նա Կարեն Կարապետյան, թե՞ Սերժ Սարգսյան երկընտրանքի մասին խոսելիս․«Երկուսն էլ հանրապետական են, երկուսն էլ փորձված, իսկ Սերժ Սարգսյանն ավելի փորձված նախագահ է: Շատ մեծ գործեր է կատարել, կատարում է: Կուսակցությունն ում որոշի, մենք էլ այդպես»։ Իրոք, պետք չէ նեղվել: Առավել ևս՝ տխրել, որ այս մարդիկ չեն տարբերվելու ՀՀԿ-ականներից։ Այդ հանրապետականները դարդ անելու պատճառ ունեն, որովհետև, ասենք, էս անգամ էլ իրենց կոճակ սեղմողներով ապահովեցին, բա հետո՞: Անի Սահակյան
Հետևեք մեզ Viber-ում
