Որպեսզի Պուտինը հարավկովկասյան «ճակատ» չբացի

Վրաստանն ու ԱՄՆ-ը 2018-ին կշարունակեն խորացնել ռազմական համագործակցությունը: «2018 թվականին Միացյալ Նահանգների և Վրաստանի ռազմական համագործակցությունը կշարունակի խորանալ», երեկ Թբիլիսիում պաշտպանության նախարար Լևան Իզորիայի հետ հանդիպումից հետո, հայտարարել է ԱՄՆ դեսպան Յան Քելին: Նրա խոսքով՝ կողմերը քննարկել են ամերիկյան արտադրության «Ջևելին» տեսակի հակատանկային համակարգեր Վրաստան մատակարարելու հեռանկարները: Սպիտակ տունն արդեն իսկ հաստատել է 75 միլիոն դոլար ընդհանուր արժողության այս գործարքը: Առաջիկա շաբաթներին դրան իր հավանությունը պետք է տա Միացյալ Նահանգների Կոնգրեսը: Հանդիպման ժամանակ Իզորիան և Քելին ամփոփել են ԱՄՆ Վրաստանի պաշտպանության նախարարի վերջերս կատարած պաշտոնական այցի արդյունքները: Դեսպանը նշել է, որ վրացական պատվիրակության այցը դրական և հաջող է եղել: Իսկ Իզորիան ընդգծել է, որ երկու երկրների համագործակցությունը պաշտպանության ոլորտում անցնում է որակապես նոր մակարդակի: Վրաստանյան տնտեսությունում վերջին տարիներին ռուսական կապիտալի ազդեցության մեծացումը ակնհայտ է, ռուսաստանցի զբոսաշրջիկների նշանակալի թիվը նույնպես տպավորիչ է: Թեև ռուս-վրացական դիվանագիտական հարաբերություններում «սառույցը չի հալչում», բայց որոշակի մեղմացում դիվանագիտականից բացի այլ մակարդակներում՝ առկա է: Առհասարակ, շատերի համոզմամբ, Բիձինիա Իվանիշվիլիի` իշխանության գալով լուծվեց Ռուսաստանի նկատմամբ չեզոքության դրսևորման քաղաքականությունը Թբիլիսիի կողմից, թեև վրաստանյան քաղաքական էլիտան պահպանում է Ռուսաստանի նկատմամբ բավական կոշտ վերաբերմունքը: Նման պայմաններում Վաշինգտոնն, իհարկե, փորձում է պահպանել Վրաստանի հետ ռազմավարական հարաբերությունները, սակայն խոշոր հաշվով Հարավային Կովկասը Ռուսաստանի՝ ազդեցության գոտու պահպանման քաղաքականությանն արմատապես չի ընդդիմանում, հավանաբար, չցանկանալով Մոսկվայի հետ սուր առճակատում բացել նաև Հարավային Կովկասում: Անգամ Վրաստանի՝ ՆԱՏՕ-ական ապագայի վերաբերյալ տարիներ շարունակ հնչում են նույնանման հայտարարություններ ու ակնարկներ, թե Վրաստանը դեռ շատ անելիք ունի այս ուղղությամբ... Միացյալ Նահանգները պահպանելով Վրաստանի հետ ռազմավարական հարաբերությունները, կարծես, սահմանափակվում է այդ մասին հայտարարություններով անելով: Սակայն իրականում այդ հարաբերությունները այնպիսի մակարդակի վրա են, որոնք չեն հանգեցնի խոշոր առճակատման ռուս-ամերիկյան հարաբերություններում՝ հարավկովկասյան ճակատում: Մետաքսյա Շալունց