Տղեր՛ք,մնացիք մենակ

Կայացավ «Հայաստան Համահայկական հիմնադրամ»-ի նախաձեռնած հերթական հեռուստամարաթոնը: «Բերքառատ Արցախ» խորագիրը կրող մարաթոնի ընթացքում հավաքվեց 12,505,456 դոլար։ Պատասխանատու մի շարք անձինք շտապեցին հայտարարել, թե կարևորը մասնակցությունն է, այլ ոչ թե նվիրաբերած գումարի չափը: Բայց քանի որ չափն ուղղակի առնչություն ունի մասնակցության հետ, ապա արժեր լինել անկեղծ ու խոստովանել, որ ոչ միայն Հայաստանի, այլեւ Արցախի նկատմամբ վստահության մեծ դեֆիցիտ կա: Հայ ժողովրդի միասնական ջանքերով կատարված հանգանակություններից ամենախոշոր ծրագիրը ինչպես հայտնի է հենց «Հայաստան» համահայկական հիմնադրամի միջոցով փոխանցումներն են: Տարբեր երկրներում կազմակերպվում են հեռախոսամարաթոններ, ռադիոմարաթոններ, հեծանվարշավներ, ճաշկերույթներ, բարեգործական համերգներ ու ցուցահանդեսներ, փոստային եւ SMS նվիրատվություններ, անհատները կտակներ են թողնում, եւ այս գումարն ամբողջացվում է Լոս Անջելեսից հեռարձակվող ամենամյա հեռուստամարաթոնում, եւ հայտարարվում է ընդհանուր թիվը: Հոգաբարձուների 40 հոգանոց խորհուրդը որոշում է գումարի ծախսման ուղղությունը: Հիմնադրամը գործում է 1992 թվականից, իսկ հեռուստամարաթոնները կազմակերպվում են 1996 թվականից: Նշենք, որ մի քանի տարի գումար է ուղղվել Հյուսիս-Հարավ մայրուղու կառուցմանը, Արցախի ճանապարհների նորոգմանը, ենթակառուցվածքների զարգացմանը:Այս տարի այն «Բերքառատ Արցախ» խորագիր ուներ, գումարը ծախսվելու է Արցախում ոռոգման ջրագծերի կառուցման նպատակով : Տարեցտարի այդ հանգանակությունների չափը ակնհայտ նվազում է: Նախորդ տարի արձանագրվեց 15,428.777 դոլարի նվիրատվություն: 20 տարվա ընթացքում եղել է ընդամենը 2 տարի, որ հավաքվել է այնքան գումար, որքան խոստացվել է՝ առաջին անգամ եւ 2002 թվականին: Երկու անգամ մարաթոն չի եղել, բայց գումար հավաքվել է՝ 1997-98 եւ 2001 թվականներին: Մեծամասնության պարագայում՝ 9 անգամ, հավաքվել է ավելի քիչ գումար, քան խոստացվել է, ընդ որում՝ ամենաահռելի տարբերությունը եղել է 2008 թվականին, երբ խոստացվել է 35 մլն․ դոլար, բայց հավաքվել է 6 մլն․ դոլարով քիչ: 7 անգամ էլ խոստացվել է ավելի քիչ, քան հավաքվել է, ընդ որում՝ տարիներ կան, որ տարբերությունն ահռելի է. 2006-ին խոստացվել է 13 մլն․ դոլար, հավաքվել է 24 մլն․, 2007-ին 15 մլն․ է խոստացվել, բայց հավաքվել է 22 մլն․, 2014-ին խոստացվել է 12 մլն․, հավաքվել է 20 մլն․ կամ 2015-ին հավաքվել է խոստացված 10 մլն․-ից կրկնակի շատ: 12 մլն․ դոլարից բարձր գումարի հավաքագրումը, սովորաբար, կապված է որոշ բարեգործների մեծ նվիրատվությունների հետ: 2016-ին, օրինակ, ԱՄՆ-ից Անդրանիկ եւ Սեդա Բաղդասարյանները տվեցին 5 մլն․ դոլար: Դրանից առաջ ռուսաստանաբնակ գործարարներ Սամվել Կարապետյանը, Լեւոն Հայրապետյանն էին մեծ գումար նվիրել: Այս տարի հեռուստամարաթոնի տասը խոշոր նվիրատուների ցանկը գլխավորում է անանուն բարերարն ԱՄՆ-ից՝ 2.5 միլիոն ԱՄՆ դոլար: Երկրորդը ռուսաստանաբնակ գործարար Սամվել Կարապետյանն է՝ 2 միլիոն 250 հազար դոլար նվիրատվությամբ: Զանգեզուրի Պղնձամոլիբդենային գործարանը 350 հազար դոլար է փոխանցել հիմնադրամի այս տարվա ծրագրերի իրագործմանը, ԱԺ պատգամավոր Սամվել Ալեքսանյանը` 200 հազար դոլար, Վարդանյանների ընտանիքը`125 հազար դոլար, «Արցախ» հայրենակցական միության նախագահ, գործարար Վարուժան Գրիգորյանը, գործարար Բարսեղ Բեգլարյանը, ԱՄՆ-ից անանուն բարերարը, Բաղդասարյանների ընտանիքը, իրանահայ Հենրիկ Տեր-Ղուկասյանը, «Վալեքս Գրուպ»-ը՝ 100 հազարական դոլար: Վահե Կարապետյանը նվիրաբերել է 60 հազար դոլար, Ժան Մարի Ատամիանը և Ալբերտ Բոյաջյանը 50 հազարական դոլար: Նշենք, որ օրինակ 2015-ին Սամվել Կարապետյանը հայտարարեց, թե 1 մլն դոլար կնվիրաբերի մարաթոնին, որի նպատակն է Արցախում 5 եւ ավելի երեխա ունեցող ընտանիքներին տներով ապահովելը:Անցյալ տարի էլ Սամվել Կարապետյանը Հայաստան համահայկական հիմնադրամին հանգանակել էր 1 միլիոն դոլար: Ընդհանրապես նա գրեթե միշտ նույնչափ է հանգանակել, սակայն այս տարի գումարը շեշտակի աճել է, ինչը բազմանշանակ կարելի է մեկնաբանել, կամ գործարարի գործերն են լավացել, կամ քաղաքական հավակնություններից բխող քայլ է: Ինչեւէ, անցած տարի Զանգեզուրի պղնձամոլիբդենային կոմբինատը կրկին 350 հազար դոլար էր փոխանցել: ԱԺ պատգամավոր Սամվել Ալեքսանյանը եւս չափը չի փոխել: Բարսեղ Բեգլարյանն էլ այս տարվա պես, անցյալ տարի հեռուստամարաթոնին է փոխանցել 100 հազար դոլար: Վարուժան Գրիգորյանը՝ 100 հազար դոլար, Գագիկ Ծառուկյանն անցյալ տարի հեռուստամարաթոնին 100 միլիոն դրամ նվիրատվություն է տրամադրել, իսկ «Գրանդ Հոլդինգ»-ը՝ 60 միլիոն դրամ, «Մաքուր երկաթ» գործարանը՝ 20 միլիոն դրամ: Անցյալ տարվա՝ «Հեռուստամարաթոն 2016»-ի ամենախոշոր նվիրատուները Անդրանիկ եւ Սեդա Բաղդասարյաններն են եղել, նրանք հանուն Արցախի հիմնադրամին փոխանցել էին 5 միլիոն դոլար: Հայաստանյան այս գործարարներն առանց մարաթոնի էլ կարող էին Արցախում իրականացվող ծրագրերին իրենց աջակցությունը բերել, ինչպես, ասենք, Գագիկ Ծառուկյանը, ով երեկ հայտարարել է, թե պատրաստվում է իր միջոցներով մի ամբողջ զորամաս կառուցել, որը տարբեր հաշվարկներով մի քանի միլիոն դոլար կպահանջի: Ասենք Ֆլեշի Բարսեղը, որին տրված է բենզինի շուկայի մենաշնորհը եւ օր օրի այդ ոլորտում կամակորություններն է թելադրում, կամայական գներ բարձրացնում, ում կարող է զարմացնել իր նվիրատվությամբ, կամ ում հաշվին է նվիրատվություն անում, իհարկե՝ շարքային քաղաքացիներիս: Ընդհանրապես, եթե տնտեսությունը մենաշնորհվել է մի խումբ անձանց`Ձեր կողմից, դուք էլ պետք է նաեւ այստեղ փողը տաք, իսկ մեծ հաշվով՝ ում համար եք այս թատրոնը բեմադրում, խոշոր նվիրատվությունների ցանկ կազմում,փակեք մարաթոնն ու մեզ մի զարմացեք մեզանից գողացված գումարների նվիրատվություններով: Անի Սահակյան