Մոուրինյոն դժգոհ է Մխիթարյանի վերջին ելույթներից

«Մանչեսթեր Յունայթեդի» գլխավոր մարզիչ Ժոզե Մոուրինյոն խոսել է թիմի կիսապաշտպան Հենրիխ Մխիթարյանի մասին, բացատրելով, թե ինչու է Մխիթարյանը բաց թողել ակումբի վերջին 2 հանդիպումները: «Ինձ չէին գոհացրել նրա վերջին ելույթները: Ես չեմ խոսում 1 կամ 2 հանդիպման, այլ 3, 4 կամ 5-ի մասին: Նա քայլ առ քայլ անհետանում էր խաղադաշտում: Նրա ելույթները՝ հաշվի առնելով խփած գոլերի, կատարած արդյունվետ փոխանցումների քանակը, բարձր պրեսինգը, գնդակի ղեկավարումը, թիմն իր հետևից տանելը՝ որպես 10 համար, մակարդակի առումով նվազում էր: Դա բավական էր, քանի որ մյուսները նույնպես աշխատում են՝ շանս ստանալու համար:  Բոլոր դիրքերն ազատ են ֆուտբոլիստներից յուրաքանչյուրի համար: Մխիթարյանը վերջին խաղերին չմասնակցեց, իսկ նրա դիրքում հնարավորություն ստացան այլ խաղացողներ: Կարծում եմ՝ արդարացի կլինի, որ Մխիթարյանը վերադառնա առաջիկա խաղում: Դա է կյանքը: Օրենքներն այդպիսին են: Միայն 18 ֆուտբոլիստ կարող է հայտավորվել: Եթե դու շանս ես ստանում և հանդես չես գալիս այնպես, ինչպես քեզնից սպասում են, դա նորմալ է»,- Մոուրինյոյի խոսքերը մեջբերում է Manchester Evening News-ը: