Սերժ Սարգսյանի պայմանը բացահայտվեց. արդյունքը կերևա երկու օրից

Հայաստանն ամբողջությամբ իր աշխատանքը կատարել է, ավելին՝ ելնելով սպասումներից, որ ԵՄ գործընկերները նույնպես այս ուղղությամբ պետք է գործադրեն համարժեք, շոշափելի ջանքեր. Արևելյան գործընկերության գագաթնաժողովում ստորագրվելիք նոր փաստաթղթում Արցախյան հիմնախնդրի լուծմանն առնչվող դրույթների ամրագրման հետ կապված հնչող մտավախությունների մասով Tert.am-ին ասել է ԱԺ Արտաքին հարաբերությունների մշտական հանձնաժողովի նախագահ Արմեն Աշոտյանը: «ԱԺ արտաքին հարաբերությունների հանձնաժողովը, Եվրոպական ինտեգրման հանձնաժողովի հետ միասին որոշում է կայացրել դեկտեմբերի 1-ին հրավիրելու թեմային վերաբերող խորհրդարանական լսումներ, ինչն իրականում, քաղաքական ավանս է, պարտավորեցնող քայլ, որպեսզի ՀՀ եվրոպացի գործընկերները ևս մեկ անգամ համոզվեն, որ գալիք գագաթնաժողովին քաղաքական փաստաթուղթ հանդիսացող հռչակագրում Հայաստանը ակնկալում է մեզ անմիջականորեն վերաբերող հարցերով կամ խնդիրներով ձևակերպումներ, որոնք բխելու են մեր ազգային և պետական շահերից: Ընկալում, որ Արցախյան հարցը մեզ համար աքսիոմատիկ գերակայություն է», տեղեկացրել է Արմեն Աշոտյանը: Նոյեմբերի 24-ին Բրյուսելում կայանալիք Արևելյան գործընկերության գագաթաժողովի հռչակագրում ԼՂ խնդրին առնչվող սկզբունքների հնարավոր ձևակերպումների վերաբերյալ, նկատվում է, որ դեռևս անորոշություն կա: Կատալոնիայում հայտնի իրադարձությունների ֆոնին մտավախություն կա, որ ԵՄ երկրները կպնդեն, որպեսզի Բրյուսելի գագաթնաժողովի հռչակագրում տարածքային ամբողջականության սկզբունքը պարտադիր ամրագրվի: Ակնհայտ է, որ հայկական կողմը վերջին շաբաթների ինտենսիվ աշխատել է ԵՄ երկրների հետ: Հարցին՝ հաջողվե՞լ է տարածքային ամբողջականության դրույթին առնչվող մասը հանել տալ հուշագրից, Արմեն Աշոտյանը պատասխանել է. «Կարծում եմ՝ փաստաթուղթը ստատիկ չէ, և առաջարկությունների ենթակա է, պարզապես վստահ եղեք, որ հայկական դիվանագիտությունն անում է ամեն ինչ, որպեսզի փաստաթղթի ձևակերպումները համարժեք լինեն մեր պետական շահերին և Եվրամիությունից մեր ակնկալիքներին` հատկապես նոր ստորագրվելիք համաձայնագրի համատեքստում»: Դիտարկմանը, թե նույնիսկ խոսակցություններ կան, որ, եթե հանկարծ ոչ հայանպաստ ձևակերպումներ լինեն Բրյուսելի գագաթնաժողովի ընդհանուր հռչակագրում, ապա Հայաստանը, միգուցե չստորագրի ԵՄ- Հայաստան համաձայնագիրը, Արմեն Աշոտյանը պատասխանել է` ժամանակավրեպ է մեկնաբանություններ տալ հնարավոր սցենարների վերաբերյալ, և այս պահին Արցախյան հարցի աքսիոմատիկ գերակայությունն է գերակա, որից էլ ԵՄ-ի հետ նոր համաձայնագրի ստորագրման թեորեմն էլ պետք է ապացուցվի ՀՀ–ի` Եվրամիության գործընկերների հետ: Այսպես, թե՛ Բրյուսելը, թե՛ Երևանը վստահեցնում են, որ նոյեմբերի 24-ին Հայաստան-ԵՄ համաձայնագրի ստորագրման հարցում տեխնիկական որևէ խոչընդոտ չկա: ԵՄ պատվիրակությունից հաստատում են, որ ԵՄ-ի կողմից ամեն ինչ պատրաստ է համաձայնագրի ստորագրման, տեխնիկական խոչընդոտներ չկան: Ըստ պաշտոնական Երևանի մեկնաբանությունների, մասնավորապես Աշոտյանի այսօրվա հայտարարությունների ենթատեքստի՝ ԵՄ երկրներին լուրջ փորձություն է սպասում. եթե ԵՄ-ն ձգտում է հասնել նրան, որպես Հայաստանն ու ԵՄ-ն ստորագրեն համաձայնագիրը, ապա Բրյուսելի գագաթնաժողովի ընդհանուր հռչակագրի տեքստում արցախյան հակամարտության վերաբերյալ պետք է ներառվեն նաև հայկական կողմի շահերից բխող սկզբունքներ: Այսինքն, կարելի է ենթադրել, որ, եթե անգամ Բրյուսելի գագաթնաժողովի ընդհանուր հռչակագրում տեղ գտնի երկրների տարածքային ամբողջականության վերաբերյալ սկզբունքը՝ դրանում նաև առանձին կետով պետք է ներառվի նաև ինքնորոշման սկզբունքը: Այլ կերպ ասած՝ Հայաստան-ԵՄ համաձայնագրի ստորագրումն, ինչ-որ առումով, կապված է նրանից, թե ինչ արտացոլում կստանա արցախյան հակամարտության վերաբերյալ ընդհանուր սկզբունքների հիշատակումը՝ Բրյուսելի գագաթնաժողովի հռչակագրի տեքստում: Ըստ ամենայնի, հենց այս պայմանն է Սերժ Սարգսյանը դրել Բրյուսելի առաջ: Թամար Բագրատունի