Գլխավոր դատախազը «աքսորել է» անհնազանդ դատախազին. վերջինս դատի է տվել Վարդապետյանին

Լոռու մարզի դատախազության նախկին ավագ դատախազ Տիգրան Քոթանջյանը, որը ներկայումս զբաղեցնում է Արարատի կայազորի զինվորական դատախազության դատախազի պաշտոնը, դատի է տվել գլխավոր դատախազ Աննա Վարդապետյանին: Այս մասին NEWS.am-ը տեղեկացավ՝ ուսումնասիրելով դատական տեղեկատվական համակարգում հրապարակված քաղաքացիական հայցերը: Նշենք, որ Տիգրան Քոթանջյանը միաժամանակ երկու հայցադիմում է ներկայացրել Երևանի քաղաքացիական դատարան: Դատախազության պաշտոնյան հայցադիմումներից մեկով դատարանին խնդրել է անվավեր ճանաչել գլխավոր դատախազ Աննա Վարդապետյանի կողմից 2025թ․ փետրվարի 6-ին կայացված «Լոռու մարզի դատախազության դատախազ Տիգրան Քոթանջյանի նկատմամբ կարգապահական տույժ նշանակելու մասին» որոշումը, իսկ մյուսով իրեն Արարատի կայազորի զինվորական դատախազության դատախազի պաշտոնին փոխադրելու մասին Վարդապետյանի 2025թ․ փետրվարի 7-ի հրամանը: Երկու հայցադիմումներն էլ մակագրվել են Երևանի քաղաքացիական դատարանի դատավոր Գոհար Գրիգորյանին և մարտի 12-ին ընդունվել վարույթ: Դատարանը որոշել է երկու վարույթներով պատասխանող ՀՀ Դատախազությունից պահանջել մեկշաբաթյա ժամկետում դատարան ներկայացնել Ա. Վարդապետյանի կողմից «Տ․ Քոթանջյանին Արարատի կայազորի զինվորական դատախազության դատախազի պաշտոնին փոխադրելու մասին» թիվ 103-Ա հրամանի, ինչպես նաև «Լոռու մարզի դատախազության դատախազ Տիգրան Քոթանջյանի նկատմամբ կարգապահական տույժ նշանակելու մասին» որոշման վերաբերյալ պատասխանողի տիրապետման տակ գտնվող բոլոր ապացույցները:

NEWS.am-ին հայտնի դարձավ, որ գլխավոր դատախազ Աննա Վարդապետյանի և դատախազ Տիգրան Քոթանջյանի հարաբերությունները լարվել են դեռևս նախորդ տարվանից: Ըստ մեզ հասած տեղեկությունների՝ դեռևս նախորդ տարի Վարդապետյանը կոնկրետ անձանց նկատմամբ քրեական հետապնդումներ հարուցելու ցուցումներ է տվել Լոռու մարզի դատախազին, որն էլ իր հերթին այն հանձնարարել է ավագ դատախազ Քոթանջյանին, սակայն վերջինս հրաժարվել է դրանք կատարել: Այս դեպքից հետո Վարդապետյանն, իրեն հատուկ վրեժխնդրությամբ, որոշել է պաշտոնանկ անել ավագ դատախազին՝ նախադրյալներ ստեղծելով, որպեսզի Քոթանջյանն ինքն անձամբ ազատման դիմում գրի:

Նախ Վարդապետյանի՝ 2024 թվականի նոյեմբերի 26-ի որոշման հիման վրա Լոռու մարզի դատախազությունում ինքնավար պաշտոն զբաղեցնող Տիգրան Քոթանջյանի նկատմամբ հարուցվել է կարգապահական վարույթ:

Ըստ դատախազության տարածած հաղորդագրության՝ վարույթի շրջանակում հաստատվել է, որ դատախազը ոչ պատշաճ է կատարել իր ծառայողական պարտականությունները: Մասնավորապես՝ պատասխանատու լինելով քրեական հետապնդման հարուցման իրավաչափության, մինչդատական վարույթի օրինականության ապահովման համար՝ հանցանքի կատարումը վկայող փաստերի առկայության պայմաններում, տևական ժամանակ ձեռնամուխ չի եղել անձանց նկատմամբ հանրային քրեական հետապնդում հարուցելու և ընթացքը լուծելու հարցին: ՀՀ գլխավոր դատախազին առընթեր էթիկայի հանձնաժողովը 2025 թվականի փետրվարի 5-ի որոշմամբ հաստատված է համարել կարգապահական խախտման առկայությունը և դատախազի մեղավորությունը: Գլխավոր դատախազի՝ 2025 թվականի փետրվարի 6-ի որոշմամբ՝ Տիգրան Քոթանջյանի նկատմամբ նշանակվել է «դասային աստիճանի իջեցում՝ մեկ աստիճանով» տեսակի կարգապահական տույժ: Իսկ հաջորդ օրը Վարդապետյանը հրամայել է Քոթանջյանին փոխադրել Արարատի կայազորի զինվորական դատախազության դատախազի պաշտոնին:

Ի դեպ՝ Աննա Վարդապետյանը պաշտոնեական լիազորությունները գերազանց կատարելու համար Քոթանջյանին 2023թ. պարգևատրվել է հոբելյանական հուշամեդալով: Ստացվում է, որ ցանկացած դատախազ, որը կփորձի հակադվել Վարդապետյանին, կզրկվի դասային աստիճանից և մեկ օրում մի մարզից «կաքսորվի մյուսը»: