Ինչու են Հայաստանում ավիատոմսերի գներն ամենաթանկը

Քաղավիացիայի ոլորտի խնդիրների քննարկումը խորհրդարանում անցավ բուռն մթնոլորտում: Քննարկումը սկսվեց «Ելք» խմբակցության հարցապնդման պատասխանով, որը ընդդիմադիր ֆրակցիան արել էր ավելի վաղ: Հարցապնդումը վերաբերում էր Երեւանի «Զվարթնոց» եւ Գյումրիի «Շիրակ» օդանավակայաններից իրականացվող չվերթներին: ՀՀ փոխվարչապետ Վաչե Գաբրիելյանը ի պատասխան հայտարարեց, որ համապատասխան չվացուցակները ներկայացվել են, դրանք անընդհատ փոփոխության են ենթարկվում. «Այս պահին Գյումրիի «Շիրակ» օդանավակայանից ունենք ամենօրյա թռիչքներ, որը մեկ ամիս առաջ չկար: Ամեն անգամ պետք է նայել կոնկրետ օրվա դրությամբ»: «Ելքը» հարցրել էր, թե ինչքան են տարբերվում Երեւանից եւ Թբիլիսիից ավիատոմսերի գները: Վաչե Գաբրիելյանը պատասխանեց, որ ճկուն գործընթաց է եւ կան բազմաթիվ գործոններ, որոնք դժվար է կանխատեսել նախօրոք: Նման է եղանակի փոփոխության գործոններին. «Ամեն անգամ կապ ունի ոչ միայն ուղղությունը, կապ ունի նաեւ, թե տվյալ օրվա ուղեւորահոսքը ինչպիսին է, տվյալ պահին ինչքան պահանջարկ կա: Կարող է 20 օր հետո թռչելու համար ուզենանք տոմս գնել, այսօր մի գին լինի, վաղը՝ մեկ այլ գին: Կարող է ռեզերվացիա անեն, տեղը թողնեն, դրա հետեւանքով տեղերը շատանան: Որպես կանոն, սակագինը կապված է վաճառքի ընթացքից»: Գնային քաղաքականությունը նաեւ պայմանավորված է վառելիքի գնով, ինչը տարբեր երկրներում տարբեր է.«Սեպտեմբերի վերջի դրությամբ Երեւանի եւ Գյումրիի օդանավակայանների վառելիքի գինը մեկ տոննայի համար կազմել է 841 դոլար: Թբիլիսիի օդանավակայանում գործող ավիավառելիքի սակագները հրապարակված չեն»: «Ելք» խմբակցության պատգամավոր Արամ Սարգսյանն ասաց, որ մեր ավիաուղիների գները թանկ են 3 հիմնական պատճառներով. «Առաջինը օդի հարկն է, որը չունի Վրաստանը, մենք ունենք: Կարծում եմ, որ 7 մլն ՀՀ-ից դուրս բնակչություն ունեցող երկիրը, որի համար օդային ճանապարհը ստրատեգիական է, նման թանկացման կամ նման գին մտցնելու իրավունք չունի եւ ժամանակն է դա հանելը: Երկրորդը ավիավառելիքի գինն է, 841 դոլար է, ճիշտ նշեցիք, 500 դոլար ՌԴ-ում է, 200 դոլար մեր հարեւան Իրանում է: Պետք է ուղղություններ ման գալ՝ էժան ավիավառելիք բերելու: Բաց երկնքի քաղաքականություն վարելով՝ միանգամից 7 ռուսական ընկերություններ մտան ավիաշուկա եւ դեմպինգի արդյունքում դուրս մնաց ոչ միայն տեղական ավիաընկերությունը, այլեւ՝ եվրոպական ավիաընկերություններ: Երրորդ պատճառը օդանավակայանում սպասարկման գներն են, որոնք բարձր են: Այս ուղղություններով աշխատանք տանել է պետք եւ նաեւ սեփական ավիափոխադրող ունենալ է պետք»: Վաչե Գաբրիելյանը հիշեցրեց, որ Գյումրին ազատված է օդի հարկիցՙՙԴրանից բացի, եթե նայում ենք անգամ օդի հարկի պարագայում, եթե նայեք Թբիլիսիից Մոսկվա եւ Երեւանից Մոսկվա թռիչքները, ապա շուրջ 20 դոլարի չափով այսօր ՀՀ-ից թռիչքները ավելի էժան են, նշանակում է՝ օդի հարկը որոշիչ չէ»: Նաիրա Զոհրաբյանը եւս փաստեց, որ Հայաստանում ավիատոմսերի գներն ամենաթանկն են աշխահում, բայց նեգրի սպասարկում է իրականացվում: Նա նշեց, որ կարևոր հարց է այն, որ Հայաստանի քաղաքացիները ինքնաթիռով այլ երկրներ հասնում են հիմնականում գիշերվա կեսին: «Նվաստացուցիչ նեգրի ռեյսեր են, մեր օդանավերը եվրոպական երկրներ իջնում են գիշերը 4-ին», - ասաց նա: Իսկ մյուս երկրներից, ըստ նրա, «սպիտակ ռեյսեր» են իրականացվում: Այս ամենը, սակայն, չի ազդում Հայաստանի ավիատոմսերի գնային քաղաքականության վրա: «Ես ուսումնասիրել եմ հարակից բոլոր ԱՊՀ երկրները, էլ չեմ խոսում եվրոպական երկրների մասին, չգիտես ինչու, ավիատոմսերն ամենաթանկը մեզ մոտ են: Ավիափոխադրումներն իրականացվում են հիմնականում գիշերվա ժամերին, որովհետև ավիափոխադրողները, գիշերը վարձակալելով միջազգային օդանավականները, ավելի քիչ գումար են վճարում: Այդ դեպքում մենք դա տեսնենք ավիատոմսերի արժեքի մեջ: Այսինքն՝ մենք վճարում ենք առաջին կարգ, էլիտնի տոմսերի գին, բայց ստանում ենք ամենաանորակ սպասարկումը»,- ասաց Նաիրա Զոհրաբյանը: Նա նշեց, որ անհարմար իրավիճակ է ստեղծվել, հայաստանյան ընտանիքները ավտոբուսներով գնում են Թբիլիսի, այնտեղից թռնում են եվրոպական երկրներ: «Զվարթնոց» օդանավակայանից շաբաթական իրականացվում է 206 չվերթ, որից 110-ը, այսինքն՝ 53 տոկոսն իրականացնում են ռուսական ավիաընկերությունները և ռուսական ուղղությամբ: Ընդ որում, միայն Մոսկվայի ուղղությամբ չվերթները կազմում են 39 տոկոս: Այս մասին էլ հայտարարեց Նիկոլ Փաշինյանը: Նա ասաց, որ Գյումրիի «Շիրակ» օդանավակայանից էլ միայն դեպի Մոսկվա չվերթներ են իրականացվում: «Արդյոք Հայաստանում կա հայկական ավիաընկերություն, այո, կա: Արմենիա անունով հայկական ավիաընկերություն կա, որը դեպի Մոսկվա ոչ մի թռիչք չունի: Ուր թռնում ա, փակուղային ինչ-որ տեղեր են: Այսինքն՝ շուկան ըստ էության մոնոպոլիզացվել է: Եվ մենք, ասելով, որ չենք ուզում ազգային փոխադրող, ըստ էության Աէրոֆլոտին և ռուսական մյուս ավիաընկերություններին դարձրել ենք ազգային ավիափոխադրող: Ինչքան աճում ա, էնքան աճում ա էս խումբ ընկերությունների ազդեցությունը շուկայում, մնացածները դուրս են մնում»,- ասաց Նիկոլ Փաշինյանը: Անի Սահակյան