Հակասություններ, քննիչի ուղղորդված հարցադրումներ․ ինչ պարզվեց Արմեն Աշոտյանի գործով դատական նիստին

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր շարունակվել է ՀՀԿ փոխնախագահ Արմեն Աշոտյանի և մյուսների գործով դատավարությունը։ Դատական նիստում շարունակվել է վկաների հարցաքննությունը, որի ընթացքում բարձրացվել են քննիչի կողմից ուղղորդման և հակասությունների հարցեր։ Նիստի ավարտից հետո լրագրողների հետ զրույցում փաստաբան Ռուբեն Մելիքյանը դիմեց իրավապահներին՝ արձանագրելով, որ հարցաքննությունը չի կարող վերածվել քննության, այդպես լինել չի կարող։

«Այսինքն՝ եթե մարդը հարցեր է տալիս՝ կապված օրենքի դրույթների առկայության, բացակայության հետ, ապա դա դարձավ փորձաքննություն, բա հարցաքննությունը փորձաքննությունից ինչո՞վ է տարբերվում»,- ասաց Մելիքյանը։

Փաստաբանը նաև արձանագրեց հակասությունների առկայությունը՝ նշելով, որ վատ պրակտիկա է ձևավորվել՝ օրենքին և տրամաբանությանը հակասող, երբ պարտավոր է հակասության դեպքում ոչ միայն հակասության բուն էությունը ապացուցել, այլև՝ այն, որ առկա է էական հակասություն, մինչդեռ, պրակտիկայում ասում են՝ նախաքննական հարցաքննության հետ հակասություն է, արդյունքում, ոչ իրավաչափորեն հրապարակվեցին նախաքննական ցուցմունքի տվյալներ։

«Չկա չարիք՝ առանց բարիքի, արդյունքում, մենք տեսանք, թե ինչ հարցեր են տրվել նախաքննության փուլում՝ ուղղորդված՝ գիծը գծված և այդ շրջանակներից դուրս գալու անհնարինությամբ»,-ասաց փաստաբանը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես 2022 տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։ Արմեն Աշոտյանը 2023 թվականի հունիսից մինչև 2024թ․ սեպտեմբերի 11-ը կալանքի տակ է գտնվել։ Դատարանը Աշոտյանի նկատմամբ որպես խափանման միջոց է կիրառել տնային կալանքը և գրավը՝ 25 մլն դրամի չափով։

Հեղինակ՝ Իզաբել Սահակյան

Աղբյուր` Փաստինֆո