Երկուշաբթի էլի քամիներ են սպասվում, ասել են պատրաստ լինենք հնարավոր տարհանման․ Կալիֆոռնիայում կրակը շարունակվում է տարածվել
«Փաստինֆո»-ն զրուցել է Լոս Անջելեսում բնակվող մեր հայրենակիցներից մի քանիսի հետ։
Նորթ Հոլիվուդ թաղամասի բնակիչ մեր հայրանակիցներից Մնաց Հակոբյանը մեզ հետ զրույցում ասաց, որ կրակը Նորթ Հոլիվուդ դեռ չի հասել, սակայն վտանգը մեծ է։
«Հրդեհի առաջին 2 օրերին ծուխը շատ էր, խեղդվում էինք, այսօր համեմատաբար լավ է, սակայն վտանգը, որ հրդեհը մեզ կհասնի՝ մեծ է։ Երկուշաբթի էլի քամիներ են սպասվում, ասել են պատրաստ լինենք հնարավոր տարհանման։ Անորոշ վիճակ է, ամեն պահի կարող է ամեն կողմից հրդեհը մոտենալ։ Տարածումը շատ մեծ է, չեն կարողանում ամբողջությամբ մարել, քամիները շատ ուժեղ են։ Բայց վատն այն է, որ այսօր տեղեկություն տարածվեց, որ մի հոգու բռնել են՝ իր տունը հրդեհելուց, այստեղ լուրեր են տարածվում, որ էլի են նման դեպքեր եղել, երբ մարդիկ իրենց տները վառել են»։
Հակոբյանը նշեց, որ թեև ապահովագրական ընկերությունները հրդեհից փոխհառուցում չեն տալիս, բայց մարդիկ կան, որ ֆինանսական հատուցում ստանալու համար գնում են այդ քայլին։
«Հույս ունեն, որ կկարողանան պետությունից փոխհատոցում ստանալ, եթե այդ տարածքները աղետի գոտի ճանաչվեն՝ պետությունը պետք է փոխհատուցի։ Այս իրավիճակն էլ իր հերթին է նոր տարածման վտանգ ստեղծում»։
Տիրան Անտապյանն էլ ասաց, որ Գլենդելում համեմատաբար կայուն է իրավիճակը, բայց ծուխը շատ է։ «Ամեն դեպքում՝ վտանգը մեծ է, որ հրդեհը մեզ էլ կհասնի։ Գիտեմ, որ արդեն մոտ 10 000-ից ավելի տուն ու շենք կա այրված»։
Նա նշեց, որ դեռ հնարավոր չէ հայ համայնքի կորուստների մասին ամփոփ տեղեկություններ հայտնել։
«Մինչև այսօր անգամ պետությունը հստակ չգիտի ինչ է կատարվում։ Հայտնի է, որ դպրոցն է այրվել, հայկական եկեղեցի է տուժել, բայց ամփոփ տվյալներ՝ մարդկանց կրած վնասների մասին, չկա։ Ապահովագրական կազմակերպություները հրաժարում են փոխհատուցելուց և ամեն բան թողնվելու է պետության վրա, բայց պետությունն էլ փորձում է ճնշում գործադրել կազմակերպությունների վրա, որպեսզի ընկերությունները ժողովրդին օգնություն տրամադրեն, որպեսզի մինչև գարուն ժողովուրդը փոքր ինչ ոտքի կանգնի։ Եթե կարճ, ապա անորոշությունները դեռ շատ են»։
Հետևեք մեզ Viber-ում
