Պլաստիկ վիրահատությունից հետո 56-ամյա կնոջ մահվան հանգամանքները դեպքից ամիսներ անց դեռ չեն պարզվել

Արթկոսմեդ էսթետիկ բժշկական կենտրոնում պլաստիկ վիրահատության ենթարկվելուց հետո 56-ամյա կնոջ մահվան հանգամանքները շարունակում են մնալ չբացահայտված՝ մահվանից չորս ամիս անց։ Քրեական վարույթի շրջանակներում առ այս պահը որևէ անձի նկատմամբ հետապնդում չի իրականացվում։ ՔԿ մամուլի քարտուղար Կիմա Ավդալյանը «Փաստինֆո»-ի հետ զրույցում հայտնել է, որ նախաքննությունը շարունակվում է, դեռևս չեն ստացվել դիակի դատաբժշկական փորձաքննության, ինչպես նաեւ հանձնաժողովային դատաբժշկական փորձաքննության եզրակացությունները։

Հիշեցնենք, որ վերոնշյալ կենտրոնում 2024թ․ հոկտեմբերի 8-ին պլաստիկ վիրահատության հետևանքով մահացել էր 56-ամյա Զաբել Կարապետյանը։ Վերջինս վիրահատվել է հոկտեմբերի 5-ին։ Կնոջ ամուսինը մեղադրում է բժշկին, քանի որ, ինչպես պարզվել է, բժիշկը միաժամանակ կնոջ մարմնի հինգ հատվածներում վիրահատություն է սկսել։ Վիրահատությունը կատարած պլաստիկ վիրաբույժ և կենտրոնի ղեկավար Արթուր Սարգսյանը հայտարարությամբ հանդես է եկել՝ կնոջ մահը կապելով սրտի կաթվածի հետ։ Արթկոսմեդ էսթետիկ բժշկական կենտրոնում պլաստիկ վիրահատության ենթարկվելուց հետո 56-ամյա կնոջ մահվան դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 187-րդ հոդվածի հատկանիշներով (Բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը)։ Վարույթի շրջանակներում նշանակվել է դատաբժշկական փորձաքննություն։

Նշենք, որ դեպքից հետո օրակարգ է բերվել նշված ԲԿ լիցենզիան կասեցնելու հարցը, համենայն դեպս, դեկտեմբերի 13-ին լրագրողների հետ զրույցում ՀՀ առողջապահության նախարար Անահիտ Ավանեսյանը հայտնել էր, որ «Արթկոսմեդ» Էսթետիկ բժշկության և պլաստիկ վիրաբուժության կենտրոնում պլաստիկ վիրահատությունից հետո 56-ամյա կնոջ մահից հետո տեսչական մարմինը միջնորդել է կասեցնել կենտրոնի լիցենզիան։

Հեղինակ՝ Իզաբել Սահակյան

Աղբյուր` Փաստինֆո