Ադրբեջանը պատերազմի է պատրաստվում, իսկ մեր ղեկավարը դարձել է բլոգեր. Զուրաբյան

«Իրականում մենք 2024թ.-ին ստացանք ճիշտ հակառակը՝ սողացող պատերազմի տարի։ Մենք տեսանք՝ մեզ խփում են, մենք կանգնում ենք, ու այդ պրոցեսը որևէ տեղ չի տանում։ Խոստացված խաղաղությունը չկա, դիվանագիտությունը ձախողված է, COP-ը տեղի ունեցավ, իսկ մեզ համար ոչ մի բան տեղի չունեցավ՝ գերիների վերադարձ, Արցախի ղեկավարների վերադարձ։ Այսինքն՝ 2024թ.-ը Փաշինյանի հեռանկարների տապալման տարի էր»: Այս մասին, այսօր՝ դեկտեմբերի 12-ին, մամուլի ասուլիսի ժամանակ ասաց ՀԱԿ կուսակցության փոխնախագահ Լևոն Զուրաբյանը։

Նա նկատեց, որ մեզ վրա կախված է հիմա այդ «Զանգեզուրի միջանցքի», այսպես ասած, օպերացիայի իրականացման վտանգը, սպառնալիքը, սա լուրջ սպառնալիք է, բայց մենք ունենք նորից նույն ոչ ադեկվատ իշխանությունը, որը կարծես չի նկատում այս իրադարձությունները: 

«Մեր երկրի ղեկավարը դարձել է սովորական մի բլոգեր, ընդ որում վատ որակի բլոգեր, որովհետև բլոգերներ կան, որ հետաքրքիր նյութեր են դնում ինտերնետում, Facebook-ում, TikTok-ում, այս մարդիկ դնում են ինչ-որ դատարկ տեսարաններ, ոնց են ինչ-որ կինո նայում, հեծանիվ են քշում, տոլմա են փաթաթում, հեռուստացույց են նայում, սափրվում են: Դարձել է The Kardashans ռեալիթի շոուն: Մեր երկրի ղեկավարը դարձել է նման մի հատ բլոգեր, որին կարծես չեն հետաքրքրում համաշխարհային քաղաքականությունը և Հայաստանի շուրջ կատարվող իրադարձությունները»,-ասաց Զուրաբյանը: