Այս քաղաքային իշխանություններն ունակ չեն, կոմպետենտ չեն, չեն կարողանում նորմալ կառավարել․ Գրիգոր Իսկանդարյան

Սիրելի՛ քաղաքացիներ,

Այսօրվա ելույթս բաղկացած է երկու մասից։ Առաջինը վերաբերում է Երևանի քաղաքապետարանի աշխատակազմին, իսկ երկրորդը՝ նրա աշխատանքներին: Հաճախ համապատասխան պաշտոնյաներն անհասանելի են դառնում, երբ պետք է լինում նրանցից հաշվետվություն պահանջել:

Պարոն Հովհաննիսյա՛ն, դուք նիստերից մեկում ասացիք, որ երբ անակնկալ գնում եք շին. հրապարակ, տեխ. հսկիչները տեղում են լիում: Ինչպե՞ս է ստացվում, որ երբ մենք ենք գնում, իսկ մեր խմբակցության անդամները շատ հաճախ են գետնի վրա աշխատում ու դա անում են 24/7 ռեժիմով, այդ հսկիչները տեղում չեն: Դուք համակարգում և վերահսկում եք Երևանի քաղաքապետարանի աշխատակազմի կոմունալ տնտեսության, շինարարության և բարեկարգման, մշակույթի և տուրիզմի, զարգացման և ներդրումային ծրագրերի, հանրակրթության վարչությունների աշխատանքները: Ես 25.07.2024թ․ հարցում էի կատարել ասֆալտբետոնյա ծածկի վերանորոգման հետ կապված, մասնավորապես՝ Երևան քաղաքում կատարված ասֆալտբետոնյա ծածկի նորոգման և վերանորգման աշխատանքների կատարողական ակտերի և սխեմատիկ հատակագծերի վերաբերյալ: Ինձ պատասխանել են, որ համաձայն Երևանի քաղաքապետարանի աշխատակազմի շինարարության և բարեկարգման վարչության կողմից ներկայացված տեղեկատվության՝ 2023 և 2024 թվականներին Երևան քաղաքի վարչական շրջաններում վարչության աշխատանքային ծրագրերով իրականացված փոսալցման աշխատանքների, ինչպես նաև միջին նորոգման աշխատանքների սխեմատիկ հատակագծերի տրամադրումը ժամանակատար է և հնարավոր կլինի փոխանցել 10-օրյա ժամկետում:

Ինձ պաշտոնապես հետևյալ պատասխանն եմ ստացել, մեջբերում. <<Ինչ վերաբերում է կատարողական ակտերի տրամադրմանը, տեղեկացնում ենք, որ ՀՀ քաղաքացիական օրենսգրքի 141-րդ հոդվածի 1-ին մասի համաձայն՝ տեղեկատվությունը ծառայողական, առևտրային կամ բանկային գաղտնիք է, եթե այն երրորդ անձանց անհայտ լինելու ուժով ունի իրական կամ հնարավոր առևտրային արժեք, չկա օրինական հիմքերով այն ազատորեն ստանալու հնարավորություն և տեղեկատվություն ունեցողը միջոցներ է ձեռնարկում դրա գաղտնիության պահպանման համար: Տվյալ դեպքում, հաշվի առնելով այն հանգամանքը, որ առկա չէ կապալառու և տեխնիկական հսկողություն իրականացնող կազմակերպությունների համաձայնությունը՝ ուստի աշխատակազմը իրավասու չէ տրամադրելու կատարողական ակտերը>>:

Տեսեք՝ մրցույթի տվյալները, մասնավորապես՝ ծավալաթերթ-նախահաշիվը, հանրային ինֆորմացիա է, այսինքն՝ դա ամբողջությամբ հասանելի է բոլորին: Հետևաբար, որքան գումար է փոխանցվելու կապալառու կազմակերպությանը և տեխ. Հսկողությանը, բոլորին հայտի է, հետևաբար այդտեղ գաղտնիություն չկա: Ինչ վերաբերում է կատարողական ակտերին, ապա դա մեծ հաշվով նույն ծավալաթերթ-նախահաշիվն է, բայց արդեն կատարվա՛ծ աշխատանքների: Հետևաբար այստեղ նույնպես գաղտնիություն չի կարող լինել: Բացի այդ ես՝ որպես Երևան քաղաքի ավագանու անդամ, պետք է կատարեմ վերահսկողական աշխատանք: Տեղեկատվությունը թաքցնելով՝ դուք խոչընդոտում եք իմ ֆունկցիաները կատարելուն: Կարո՞ղ եմ ենթադրել, որ դա անում եք միտումնավոր, որպեսզի թաքցնեք Ձեր կատարած վատ և անորակ աշխատանքը: Կամ էլ՝ այլ բան:

Հաջորդը:

Պարո՛ն Բեգոյան, հիշո՞ւմ եք, որ կանաչապատման ՀՈԱԿ-ում հրեհ էր բռնկվել և ես առաջիններից էի, որ եկա տարածք: Դուք ասացիք՝ էտից առաջացած ճյուղերն են հրդեհվել և հավելեցիք, որ պարբերաբար այրում եք դրանք՝ ԱԻՆ-ի հետ համատեղ: Վերջերս իմացանք, որ Ձեզ կամ ՀՈԱԿ-ին տուգանել են վարչական իրավախախտման համար:

Կա երեք տարբերակ.

1. Կա՛մ Դուք, քաղաքապետարանի մնացած աշխատակիցները և ԱԻՆ-ը իմացել եք, որ օրենք եք խախտում, բայց շարունակել եք դա անել:
2. Կա՛մ Դուք չեք իմացել, որ օրենք եք խախտում: Եվ, փաստորեն, քաղաքապետարանում թեև աշխատում է մոտ 30.000 մարդ, բայց ոչ ոք չի իմացել դրա մասին: Չեն իմացել նաև ԱԻՆ-ի աշխատակիցները, ինչը շատ վատ է:
3. Կամ էլ՝ քաղաքապետարանի որոշ աշխատակիցներ իմացել են դրա մասին, բայց Ձեզ չեն տեղեկացրել՝ փորձելով գցել ՀՈԱԿ-ի առանց այդ էլ ցածր վարկանիշը:

Այս երեք տարբերակներն էլ ապացուցում են, որ այս քաղաքային իշխանություններն ունակ չեն, կոմպետենտ չեն, և չեն կարողանում նորմալ կառավարել:

Նշեմ նաև Կանաչապատման ՀՈԱԿ-ի հետ կապված մեկ այլ դեպք, որից պարզ են դառնում կոռուպցիոն ռիսկեր, և որքան տեղյակ եմ՝ դրանով զբաղվում է նաև Հակակոռուցիոն կոմիտեն:

Սիրելի՛ քաղաքացիներ, 2024թ․ հունվարի 18-ին հայտարարվել է մրցույթ «Կանաչապատում և շրջակա միջավայրի պահպանություն» ՀՈԱԿ-ի կողմից, որն ունեցել է 11 չափաբաժին: Ամեն չափաբաժինն առանձին ծառատեսակ է: Մասնակցել է 4 կազմակերպություն, որոնցից 3-ն առաջարկել են շատ բարձր գներ, իսկ այդ կազմակերպություններից մեկն առաջարկել է ճիշտ այնքան գումար, ինչքան որ հրավերի գումարն է: Ավելի ճիշտ 0.5% ցածր է առաջարկել, որովհետև ավելացված արեժեքի հաշվարկի ժամանակ հստակ նույն գումարը ստանալն անհնար է:

Եթե նայենք այն կազմակերպությունների գումարներին, որոնք բարձր գին են առաջարկել, ապա պարզվում է, որ նրանք այդ գումարներն առաջարկել են ամբողջ հրավերի համար, այլ ոչ թե առանձին չափաբաժինների: Այսինքն, ընդհանուր մրցույթի գումարը եղել է 82 650 000 դրամ, իսկ այդ երեք կազմակերպություններն առաջարկել են համապասխանաբար 70 000 000, 35 500 000 և 80 000 000 դրամ՝ ամեն առանձին չափաբաժնի համար: Ստացվում է՝ նրանք սխալվել են կամ չեն հասկացել, որ 11 չափաբաժին է: Բայց ես ստուգեցի նաև այդ կազմակերպությունների այլ մրցույթների հայտերը և պարզեցի, որ նրանք մասնակցել և շահել են այլ մրցույթները, որտեղ եղել են շատ չափաբաժիններ: Հետևաբար նրանք գիտեն, թե ինչպես ճիշտ մասնակցել մրցույթներին:

Կարո՞ղ ենք ենթադրել, որ նրանց կա՛մ ստիպել են, կա՛մ համոզել են, կամ էլ խաբել են, թե իբր մեկ չափաբաժին է լինելու: Հետևությունները թողնում եմ Ձեզ, հարգելի՛ քաղաքացիներ: Ի դեպ, այդ մրցույթով գնված ծառերը շուկայականից մոտ 300% ավելի թանկ են: Օրինակ՝ 3մ բարձրությամբ արևելյան սոսիի շուկայական գինը 25 000 դրամ է, իսկ գնել են 80 000 դրամով:

Ահա այսպիսի բաներ, հարգելի՛ քաղաքացիներ: