Հակոբ Արշակյանը գործարարներին խորհուրդ տվեց կարդալ «Սիներջիի» կալանավորված տնօրենի գիրքը (video)

«Արհեստական բանականությունը բիզնեսի համար» խորագրով համաժողովում ԱԺ փոխնախագահ Հակոբ Արշակյանն ամբիոնից իր անուղղակի աջակցությունը հայտնեց կոռուպցիոն չարաշահումների աղմկահարույց գործով 2 ամսով կալանավորված «Սիներջի» ընկերության տնօրեն Աշոտ Հովհաննիսյանին։

«Ուզում եմ մի մարդու մասին ձեզ հետ կիսվել, ով վերջերս գիրք է հրատարակել, որը կոչվում է «Վերելք», խոսքը «Սիներջի» ընկերության տնօրեն Աշոտ Հովհաննիսյանի մասին է։ Իր գրքում խոսում է ՀՀ-ի՝ դեռ Սովետական Միությունից թվայնացման մասին։ Մենք ունեցել ենք առողջապահության առաջին թվայնացված համակարգը՝ Սովետական Միությունում և ոչ միայն։ Կարծում եմ՝ ամբողջ աշխարհում առաջիններից ենք եղել և այդ բոլոր ձեռքբերումների հեղինակն Աշոտ Հովհանիսյանն է, ով իր կյանքի բազմաթիվ վերելքներով ու մարտահրավերների հաղթահարումներով այսօր արդեն Հայաստանում խոշոր հարկատուների ցանկում ներգրավված հարյուրավոր աշխատակցիներ ունեցող ընկերության հիմանդիրն է և տնօրենը»,-ամբիոնից հայտարարեց Արշակյանը։

Նա խնդրեց ներկաներին ծափահարություններով ողջունել «Սիներջի» ընկերության տնօրեն Աշոտ Հովհաննիսյանին։ «Ես կուզենամ, որ ծափահարություններով ողջունեք Աշոտ Հովհաննիսյանին, մանավամդ բզինեսի ներկայացուցիչներին ու երիտասարդներին կոչ անել անպայման ձեռք բերել և կարդալ գիրքը, որը ինձ ոգևորել է և շատ գաղափարներ է տվել»,-ասաց նա։