Ադրբեջանը «Զանգեզուրի միջանցքին» հասնելու համար պատրաստ է նաեւ ուժ կիրառել. Տիգրան Աբրահամյան (video)

Փաստացի այսօր ունենք մի իրավիճակ, երբ Ադրբեջանը Հայաստանի գլխին իջեցրել է մաքսիմալիստական օրակարգ, որը ենթադրում է ոչ միայն Արցախի հանձնումն Ադրբեջանին, այլև ՀՀ-ի նկատմամբ պահանջներ կան, լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը։

«Առաջին հերթին՝ Ադրբեջանի օկուպացրած տարածքների լեգիտիմացմանը, կան նաև նոր տարածքային պահանջներ, որոնք չեն սահմանափակվում բացառապես այդ 8 գյուղերով։ Վերջին օրերին բավականին ակտիվ շրջանառվում է նաև միջանցքի թեման և Ադրբեջանն, ըստ էության, չի էլ փորձում թաքցնել, որ դրան հասնելու է ամեն գնով», - ասաց պատգամավորը։

Ադրբեջանի կողմից ներկայացվող բոլոր պահանջների աճը, ըստ պատգամավորի, ցույց է տալիս արտաքին քաղաքականության այն տապալումները, որոնք ունեցել է ՀՀ իշխանությունը։

«Առաջիկայում, ցավոք, մեզ սպասվում են նոր, ծանր իրադարձություններ և, ցավալիորեն պետք է արձանագրենք, որ Հայաստանի այս իշխանությունն իր քայլերով առավել բարենպաստ դաշտ է ձևավորում ադրբեջանական նոր ագրեսիայի համար», - նշեց Տիգրան Աբրահամյանը։