Նիկոլի գլխավոր դատախազը հեգնեց Խաչատուր Սուքիասյանին (video)

Պետական մարմինների անփութությունը և անպատասխանատվությունը բերում է շատ ֆիզիկական ու իրավաբանական անձերի ֆինանսական կորուստների. Հաճախ չեն պատասխանում կամ պատշաճ չեն պատասխանում նամակներին։ Այս մասին այսօր՝ մայիսի 3-ին, ԱԺ-ում դիմելով գլխավոր դատախազին, ասաց ՔՊ խմբակցության պատգամավոր Խաչատուր Սուքիասյանը։

«Երբ մայրուղիներում պետք է ասֆալտապատման աշխատանքներ տարվեն, նախապատարստական աշխատանքների հետևանքով այդ փոսերը ավելի են մեծանում, հազարավոր մեքենաներ այդ փոսերի պատճառով, որ նշաններ դրված չի, ջարդում են ինչ-որ պահեստամասեր, որոնք ՀՀ-ում չեն արտադրվում, այդ արտարժույթը գնում է դուրս»,- ասաց պատգամավորը։

Պատասխանելով՝ Աննա Վարդապետյանը նշեց, որ կփորձի հարցին անդրադառնալ դատախազությանը վերաբերող մասով. «Պետական մարմինների անհետևողականության այն դրսևորումները, որոնք պաշտոնական անփութության կամ պաշտոնական դիրքի չարաշահման դրսևորումն ունեն, ուղիղ գտնվում են դատախազության իրավասության ներքո։ Նույն ճանապարհաշինության, սուբվենցիոն ծրագրերի հետ կապած և բոլոր այն գործերը, որոնք գործ ունեն հանրային բարիքի հետ, պետական պաշտոնյաների դիրքի չարաշահումները ու անփութությունները գտնվում են մեր ուղիղ ուշադրության ներք։

Բոլոր այն իրավիճակները, որոնք հանցագործության հատկանիշներ չեն պարունակում, բայց պահանջում են վերադաս մարմինների ուշադրությունը, ես կամ իմ ենթակայության ներքո գտնվող դատախազները միջնորդություններ ենք ներկայացնում այդ մարմիններին»,- ասաց դատախազը։

Արձագանքելով՝ Սուքիասյանն ասաց. «Դեպքեր կան, որ ասում են դիտավորություն կա։ Ամբողջ հարցն այն է, որ այն կազմակերպությունները, որոնք այս կամ այն կերպ առնչվում են պետական մարմինների հետ, ցանկացած փաստաթղթի վերջնական համաձայնության արդյունքում, դառնում են հարկ վճարողներ և եթե ամիսներ շարունակ այդ կազմակերպությունը խնդիրներ է ունենում, նշանակում է այդ ամիսներին նա հարկ չի կարողանում վճարի:

Ես մի օրինակ բերեմ, բայց հասցեն չեմ ասի. Ես գիտեմ, որ 2,5 տարի առաջ մի մեծ փողոցում LED լույսեր են դրվել, բայց միացում մինչեւ հիմա չի տրվել՝ 2,5 տարի: Ինչ-որ մեկը դրա համար պետք է պատասխան տա՞»:

Վարդապետյանը ժպիտով արձագանքեց. «Մենք այդ LED լույսերը կգտնենք, եթե խոսքը Երեւանի մասին է: Այո, մենք այս տեսակ հանրային բարիքի նկատմամբ անպատասխանատու վերաբերմունքի իմաստով էլ ունենք գործառույթ»: