Եթե չկռվեինք, զոհեր չտայինք, ինչքան ուզում է՝ ՌԴ ԱԳՆ–ն աջ ու ձախ զանգեր աներ. Անդրանիկ Քոչարյան (video)
Մի քիչ անհասկանալի է, որ Մարիա Զախարովան Հայաստանից պարզաբանումներ է պահանջում, ՀՀ-ն առաջ է շարժվում ՀՀ պետական շահերով և ամեն ինչ անում է իր զինված ուժերի մարտունակությունը բարձրացնելու ուղղությամբ, լրագրողների հետ զրույցում ասաց ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը՝ արձագանքելով դիտարկմանը, թե Զախարովան պարզաբանումներ է խնդրել Երևանից՝ ՆԱՏՕ-ի զորավարժություններին ՀՀ-ի մասնակցության վերաբերյալ։
«Եվ այդպես էլ շարունակվելու է։ Հայաստանի Հանրապետությունն իր ռազմավարական գործընկերոջ՝ Ռուսաստանի հետ շարունակում է ջերմ, բարեկամական ռազմավարական հարաբերությունները, իր ջերմ հարաբերությունները շարունակում է նաև այլ երկրների մեր գործընկերների հետ և ամեն ինչ անում է ի նպաստ ՀՀ զինված ուժերի զարգացման և մարտունակության բարձրացման», - ասաց Արթուր Հովհաննիսյանը։
ՔՊ-ական Անդրանիկ Քոչարյանն էլ արձագանքեց ՌԴ ԱԳՆ պաշտոնական ներկայացուցչի հայտարարությանը՝ ասելով.
«Տիկին Զախարովան ասել է, թե Ռուսաստանի անմիջական մասնակցությամբ գործողությունները Տեղ գյուղում դադար են ստացել։ Կասկածի տակ չեմ դնում իր ասածը, որ ինչ-որ չափով մասնակցել են, բայց կռվել են մեր զինվորները։ Եթե մենք չկռվեինք, զոհեր չտայինք, ինչքան ուզում է ՌԴ արտաքին գերատեսչությունը զանգեր աներ աջուձախ, դա խնդրի լուծմանը չէր տանելու։ Խնդիրը լուծվել է բացառապես մեր զինվորականության քաջարի գործողությունների արդյունքում»։
Հետևեք մեզ Viber-ում
