«Ինձ մի սպառնացեք»․ ՄԻՊ թեկնածուի հարցի քննարկումն անցնում է լարված մթնոլորտում (video)

ԱԺ մարդու իրավունքների պաշտպանության և հանրային հարցերի մշտական հանձնաժողովի արտահերթ նիստին ԱԺ երկու ընդդիմադիր խմբակցությունների կողմից որպես ՄԻՊ-ի թեկնածու առաջադված Էդգար Ղազարյանը նիստի սկզբում նշեց, որ ցանկանում է, որ հավասար պայմաններ ապահովվեն:

«Ուզում եմ խնդրել ձեք, որպեսզի ապահովեք հավասար պայմաններ առաջադրված թեկնածուների համար՝ հիմնվելով ոչ միայն արդարության սկզբունքի, այլ նաև օրինականության սկզբունքի վրա։ Փաստն այն է, որ ՔՊ-ի կողմից ՄԻՊ պաշտոնում առաջադրված թեկնածուն չի համապատասխանում Սահմանադրության 192-րդ հոդվածի երկրորդ կետին։ Խնդրում եմ, որպեսզի հայտարարվի 20 րոպե ընդմիջում առաջադրված թեկնածուին ինքնաբացարկի հնարավորություն տալու համար»,-ասաց Էդգար Ղազարյանը։

Նրա ելույթից հետո իրավիճակը լարվեց, և Արթուր Հովհաննիսյանն ընդհատեց Ղազարյանին և հորդորեց հանձնաժողովի նախագահին թույլ չտալ շեղվել նիստի ընթացակարգից: Նա դիմելով նիստը վարող Թագուհի Թովմասյանին՝ ասաց. «Տիկի՛ն Թովմասյան, ապահովեք նիստի բնականոն ընթացքը: Թեկնածուն ունի հիմնական ելույթի ժամանակ: Մենք նոր հաստատեցինք նիստի հատուկ ընթացակարգը, ես հորդորում եմ պահպանել այդ հատուկ ընթացակարգը: Տվյալ անձնավորությունն այս պահին չունի ելույթի իրավունք»:

Ի պատասխան նիստը վարող Թագուհի Թովմասյանն ասաց. «Դուք ինձ մի՛ թելադրեք՝ ես ինչ անեմ, ես կվարեմ նիստը: Պարոն Ղազարյան, չենք կարող հայտարարել ընդմիջում, քանի որ թեկնածուն նման առաջարկի իրավասություն չունի»: