Նիկոլը, «Մարտի 1»-ն ու մարդասպանները (video)

Մարտի 1-ը բացահայտված է, բայց մեղավորները դեռևս պատժված չեն ամենատարբեր պատճառներով, այդ թվում՝ ձեզ հայտնի իրավական մի շարք որոշումներով, Մարտի 1-ի զոհերի հիշատակին նվիրված հուշարձանի բացմանը լրագրողների հետ զրույցում ասաց վարչապետ Նիկոլ Փաշինյանը։

«Բայց ասեմ՝ այն, որ մինչև հիմա Մարտի 1-ի մարդասպանները հայտնաբերված չեն, դա չի նշանակում, որ այդպես չի լինի։ Մեծ խնդիրներից մեկը հետևյալն է, որ նաև քրեական գործի վարույթներով հիմնավորվել, ապացուցվել է, որ նախաքննությունը 2008 թվականի մարտի 1-ից հետո ոչ միայն ամբողջ ջանքերը չի գործադրել, որպեսզի տեղի ունեցած հանցագործությունը բացահայտվի, այլև բոլոր հնարավոր ջանքերը գործադրվել են, որպեսզի բացահայտումը կամ դժվար լինի,կամ անհնար դառնա», - ասաց Նիկոլ Փաշինյանը։

Նա ասաց, թե իր դիրքորոշումն այն է, որ պետք է հասնել լիարժեք և ամբողջական բացահայտմանը։

«Այն, որ մարտի 1-ը բացահայտված է առնվազն մինչև կատարողների մակարդակ, այսինքն՝ բուն կատարողները հայտնի չեն, իսկ մնացած շղթաները ոնց են աշխատել, իհարկե, բացահայտված է», - ասաց վարչապետը։